Zaidi ya shilingi milioni 800 kutumika ujenzi wa kituo cha afya Kisiwa cha Ukara

Imewekwa tar.: November 18th, 2018

Imeelezwa kuwa zaidi ya shilingi milioni 800 zinategemewa kutumika kwa ajili ya ujenzi wa kituo cha Afya Bwisa kilichopo  katika Kisiwa  cha Ukara  ikiwa ni ahadi  aliyoitoa Mheshimiwa Dkt John Pombe Magufuli Rais wa Jamhuri ya Muungano wa Tanzania wakati ilipotokea ajali mbaya ya kuzama kwa kivuko cha MV Nyerere.

Hayo yamesemwa na Waziri wa Nchi Ofisi ya Rais Tawala za Mikoa na Serikali za Mitaa Mhe. Selemani Jafo mapema leo,wakati akizundua  rasmi ujenzi na upanuzi wa Kituo cha Afya Bwisa kilichopo Kisiwani Ukara.

Ahadi hiyo ya Rais Magufuli ilielekeza pamoja na mambo mengine kutumia sehemu ya fedha za rambirambi takribani milioni 856 kuboresha, kuimarisha na kupanua miundombinu ya kituo cha afya bwisya kifikie hadhi sawa na hospitali ya wilaya kwa lengo la kusogeza huduma bora ya afya kwa wananchi wa kisiwa hicho wapatao 44,000 ambao wapo mbali na hospitali ya wilaya.

Mhe. Jafo alikagua na kuzindua rasmi shughuli za ujenzi wa hospitali hiyo inayojengwa na kusimamiwa na jeshi la wananchi Tanzania chini kikosi cha SUMA JKT.

Akihutubia wananchi wa kisiwa cha Ukara, Mhe Jafo alisisitiza kuwa wajenzi wazingatie ujenzi wa majengo yenye viwango na kuhakikisha wanakamilisha kwa wakati shughuli hiyo.

"Ni matumaini yangu kuwa ifikapo Mwezi Februari, 2019 kazi hii itakuwa imekamilika kwa kiwango kinachokubalika. Kwa uzoefu wenu katika miradi na operesheni kama hizi Sina shaka SUMA JKT mtafanya kazi hii kwa uaminifu mkubwa na uzalendo ili kutimiza ahadi na ndoto ya Amiri Jeshi Mkuu Dkt John Pombe Magufuli kwa wana ukara na watanzania wote kwa jumla" alisisitiza Jafo

Mhe. Jafo amesema kimeundwa kikosi kazi maalum chenye wataalam kutoka taasisi mbalimbali ikiwemo jeshi la wananchi wa Tanzania, wataalam wa sekretariati ya Mkoa, Halmashauri za Mkoa wa Mwanza na taasisi zingine za Serikali kitakachosimamia ujenzi huo kwa umakini mkubwa kikiongozwa na Luteni Hamis Masoud.

Wakati huohuo Mkuu wa Mkoa wa Mwanza Mhe mongella alifafanua kuwa imeelekezwa mafundi na vibarua wote watoke miongoni mwa wananchi na wakazi wa kisiwa cha ukara na maeneo jirani ili kuzalisha ajira na ujira kwa wazawa.

Amesema tayari manunuzi ya vifaa vya ujenzi umefanyika ambapo mkoa ulisimamia jambo hilo kwa kuagiza bidhaa moja kwa moja toka viwandani ili kupunguza gharama za ujenzi wa hospitali hiyo, alisema mongella.

Aidha kisiwa cha Ukara ni miongoni mwa visiwa 38 vinavyounda wilaya hiyo ambapo kati ya hivyo, visiwa 25 ni makazi ya kudumu ya watu na visiwa 13 ni makazi yasiyo ya kudumu.