Wekezeni Fedha za Mfuko kwenye Miradi Isiyo na Athari – Nyamhanga

Imewekwa tar.: September 30th, 2020

Na. Asila Mohammed - Dodoma

Katibu Mkuu Ofisi ya Rais Tawala za Mikoa na Serikali za Mitaa Mhandisi Joseph Nyamhanga amewaasa wajumbe wa Mkutano Mkuu wa Mfuko wa Faraja kuwekeza fedha kwenye miradi yenye kuleta matokeo chanya na isiyo na athari kubwa ili kuleta maendeleo ya haraka ya Mfuko.

Mhandisi Nyamhanga ameyasema hayo Jijini Dodoma jana wakati akifungua mkutano wa Mfuko wa Faraja kwa mwaka 2020 ambao unahudumia watumishi wa Ofisi ya Rais TAMISEMI na Taasisi zilizo chini yake kwa lengo la kuwaunganisha watumishi hao kwa kusaidiana pindi wanapopatwa na matatizo kama misiba na kuugua kwa muda mrefu.

Amesema uwekezaji mzuri unahitaji kiasi kikubwa cha fedha na ili kupata fedha hizo ni lazima kila mtumishi achangie kwa ajili ya kutunisha mfuko huo kabla ya kuangalia aina ya uwekezaji unaofaa kupitia kamati tendaji.  

‘’Kamati tendaji inajukumu la kuangalia eneo gani zuri kwa ajili ya uwekezaji’’ alisisitiza.

Mhandisi Nyamhanga ameishauri Idara ya Utawala na Rasilimali Watu kama mlezi wa mfuko wa Faraja kuhakikisha watumishi wote wanachangia katika mfuko huo kwani lengo ni kusaidina wakati wa shida.

‘’Idara ya Utawala na Rasilimali Watu lazima isimamie na kuhakikisha kila mtumishi anakatwa na kila shilingi isimamiwe kwa karibu ili fedha hizo zisitumike kwa matumizi yasiyopangwa’’ alisema Nyamhanga.

Awali Mkurugenzi wa Utawala na Rasilimali Watu Ofisi ya Rais TAMISEMI Victor Kategere   alisema Viongozi wa mfuko ni lazima wasimamie watumishi katika kutatua changamoto zao na kuzitolea majibu kwa kuzingatia katiba, kanuni na taratibu zilizopo za uendeshaji wa mfuko huo ili kuleta ufanisi.

Naye Mwenyekiti wa Mfuko wa Faraja Ofisi ya Rais – TAMISEMI Bw. Boniphace Luhende alisema ameridhishwa na ushiriki wa wanachama hao na kusema lengo la kuanzishwa kwa mfuko wa Faraja mwaka 2017 lilikuwa ni kusaidiana wanachama pindi wanapopatwa na matatizo na pia alimshukuru Katibu Mkuu Ofisi ya Rais -TAMISEMI ambaye ni mwajiri na mlezi wa mfuko huo kwa kuwaruhusu watumishi kushiriki katika mkutano wa mwaka kujadili agenda za zilizopangwa ili kupata mustakabali  wa mfuko.

Akisoma taarifa ya mapato na matumzi  wakati wa mkutano huo, Mtunza Hazina  wa Mfuko wa Faraja  Bi.Ummy Wayayu alisema Katika mwaka wa 2019/2020 mapato ya mfuko yaliongezeka kufikia kiasi cha shilingi 149,926,306.74na hadi mwezi Juni, 2020 salio lilikuwa ni shilingi milioni 133,571,791.20 baada ya kuwahudumia wanachama wa mfuko pamoja na gharama nyinginezo.

Wayayu amesema jumla ya watumishi wapatao 562 chini ya Ofisi ya Rais TAMISEMI ndio wanachama na kati yao watumishi 525 ndio wanakatwa kiusahihi ambapo watumishi 14 wanakatwa makato pungufu na watumishi 23 hawakatwi kabisa.

Aidha, Amesema katika mwaka 2018/19 na 2019/20 zaidi ya wanachama 36 waliofiwa na wazazi na wanachama 3 waliokuwa wagonjwa mfuko uliweza kushughulikia matatizo yao na pia kuongeza viwango vya mafao kwa wanachama kutoka shilingi 100,000/= hapo awali na kufikia shilingi 1,000,000/=

Mkutano huo wa mwaka ulishirikisha watumishi wote wa Ofisi ya Rais Tawala za Mikoa na Serikali za Mitaa na baadhi ya Taasisi zilizopo chini yake ambazo ni Chuo cha Serikali za Mitaa Hombolo, DART, TARURA, Shirika la Elimu Kibaha, Shirika la Masoko Kariakoo na Bodi ya Mikopo ya Serikali za Mitaa.