MICHANGO ISIZUIE MTOTO KUPATA ELIMU

Imewekwa tar.: July 26th, 2024

Na Angela Msimbira, NZEGA

NAIBU Waziri, Ofisi ya Rais Tawala za Mikoa na Serikali za Mitaa,  Mhe

Zainab Katimba amesisitiza kuwa uchangiaji katika sekta ya elimu usitumike kumuadhibu mwanafunzi ambaye mzazi wake kashindwa kutoa mchango.

Mhe.Katimba ameyasema  hayo leo Julai 26, 2024  akiwa katika ziara ya kukagua miundombinu ya sekta ya elimu katika mamlaka za serikali za mitaa.

Katimba amesema michango yenye kiwango kikubwa inaondoa  dhana ya serikali ya elimu bila malipo, hivyo halmashauri zote zinatakiwa kufuata miongozo ya uchangishaji shuleni.

“Nimeona hapa mnautaratibu wa kuchangisha wanafunzi na mmesema mnawachangisha laki sita kwa mwaka, hiki ni kiwango kikubwa, na kimsingi kinaondoa tafsiri ya elimu bila malipo.”

“Huwezi ukamwambia mzazi au ukamwambia mtanzania kwamba elimu bila malipo, anamleta mtoto shule anakutana na mchango mikubwa  na sio kila mzazi atakuwa na uwezo wa kutoa."

Kuhusu changamoto ya ukosefu wa kichomea taka na uzio, Mhe.Katimba  aliielekeza halmashauri ya Mji Nzega kutumia mapato ya ndani kutatua changamoto hiyo. 

Amesema dhamira ya Rais Samia Suluhu Hassan ni kuhakikisha watoto wote wa kitanzania wanapata haki ya kumaliza mzunguko wao wa elimumsingi tena bila malipo.

“Masharti ya michango hii ni kwamba wale wazazi watakaoshindwa kwasababu fulani kutoa michango hii watoto wao wasiadhibiwe kwa kuwambiwa watoto wao wasiingie shuleni. Mchango haimaanishi mtoto akose haki ya kwenda shule kwasababu amekosa mchango wakati amelipiwa ada na Mheshimiwa Dk Samia Suluhu Hassan.

Kuhusu changamoto ya uzio na kichomea taka, Katimba aliiagiza halmashauri ya Nzega kutenga fedha kupitia mapato ya ndani ili kutatua changamoto hiyo.

Naye Afisa Elimu Sekondari Halmashauri ya Mji wa Nzega, Lulu Nchiha alisema wazazi wanachangia chakula chenye thamani ya Sh laki sita.