Waziri Ummy akoshwa na Utendaji wa watumishi TAMISEMI

Imewekwa tar.: April 10th, 2021

Na Atley Kuni, OR-TAMISEMI

WAZIRI wa Nchi Ofisi ya Rais, Tawala za Mikoa na Serikali za Mitaa, Mhe. Ummy Mwalimu, ameridhishwa na kiwango cha utendaji kazi cha watumishi wa Ofisi hiyo kwakujitoa na kuhakikisha kila mmoja anatimiza wajibu wake bila kutegea.

Akizungumza wakati wa uzinduzi wa Baraza la Wafanyakazi wa Ofisi hiyo amesema, pamoja na muda mfupi alionao katika Wizara, lakini amekoshwa na kiwango cha utendajikazi, kwakuwa watumishi wa TAMISEMI wamekuwa tayari kujitoa kwa muda wa ziada ili kukamilisha malengo waliyojiwekea.

“Nichukue nafasi hii kuwapongeza kwa kazi nzuri mnayofanya lakini pia niwapongeze kwa kazi nzuri iliyofanyika katika kipindi cha mwaka wa fedha 2020/21.  ikiwepo kukamilisha Jengo la Ofisi katika Mji wa Serikali wa Magufuli (Magufuli City) Mtumba na kuhamia, Usimamizi na Ufuatiliaji wa Ujenzi wa Majengo ya Utawala katika Mikoa, Halmashauri, Tarafa, Kata, Mitaa na Vijiji.” Amesema Mhe. Ummy.

Waziri Ummy amesema, Ofisi ya Rais-TAMISEMI, imefanya kazi kubwa ya usimamizi na ufuatiliaji wa ujenzi wa Hospitali za Wilaya na Vituo vya kutolea Huduma za Afya pamoja na kufanikisha uandikishaji wa Wanafunzi wa Darasa la Kwanza kutokana na Sera ya Elimu bila malipo, lakini pia amepongeza kwa usimamizi imara ulio wezesha kuongeza ufaulu wa wanafunzi wa Darasa la Saba, Kidato cha Nne na Kidato cha Sita.

“Suala lingine natambua kumekuwa na Ongezeko la Mapato ya ndani katika ngazi ya Halmashauri kutoka vyanzo mbalimbali kama vile, ushuru wa mazao, ushuru wa huduma, vibali, ushuru wa magulio na masoko, ada za shule kwa Kidato cha Tano na Sita na ada za uchangiaji huduma za afya na vyanzo vinginevyo kulingana na mapato ya Halmashauri husika, hii yote ni kazi yakupigwa mfano ambayo TAMISEMI mmeweza kusimamia kwa weledi ikiwepo Ujenzi wa madarasa, Maabara, Mabwalo na Mabweni katika shule zetu” alisema Waziri Ummy.

Kuhusu Mabaraza ya wafanyakazi, Waziri Ummy amesema, mabaraza ya wafanyakazi yapo kisheria hivyo yatumike katika kujadili kwa kina mambo yote waliyopanga ili tija iliyo kusudiwa ipatikane.

“Sote tunatambua kwamba Mabaraza ya Wafanyakazi ni Vyombo vya Kisheria vilivyoundwa chini ya Sheria ya Mashauriano katika Utumishi wa Umma ya Mwaka 2003 Kifungu cha 30(3) (The Public Service Negotiating Machinery, Act 2003) kwa lengo la kuongeza tija na uwajibikaji mahali pa kazi”.

Awali akimkaribisha kwa ajili ya uzinduzi wa Baraza hilo, Mwenyekiti wa Baraza la wafanyakazi, ambaye pia ni Katibu Mkuu wa TAMISEMI, Prof. Riziki Shemdoe, alisema Madhumuni ya Baraza la Wafanyakazi ni kutoa fursa kwa watumishi kupitia wawakilishi wao, kujadiliana juu ya masuala mbalimbali ya msingi yanayohusu tija na ufanisi kwa upande mmoja na maslahi ya watumishi kwa upande mwingine.

“Baraza la Wafanyakazi linaongeza ushiriki wa Wafanyakazi katika uendeshaji wa shughuli za Taasisi yao kama ilivyofafanuliwa katika Sheria ya Majadiliano ya Pamoja katika Utumishi wa Umma Sura 105” alisema Prof. Shemdoe.

Kupitia kikao hicho Wajumbe wa baraza hilo la wafanyakazi, limepitisha kwa kauli moja bajeti ya Ofisi ya Rais, TAMISEMI yenye jumla ya shilingi 7,683,329,644,800.00 kwa ajili ya Fungu Na.56 Ofisi ya Rais, TAMISEMI, Fungu namba. 2. Tume ya Utumishi wa Walimu na Mafungu 26 ya Mikoa.