Waziri Mkuu Kassim Majaliwa aipongeza TARURA

Imewekwa tar.: December 2nd, 2021

Waziri Mkuu wa Jamhuri ya Muungano wa Tanzania, Mhe. Kassimu Majaliwa amekagua na kuridhishwa na utekelezaji wa mradi mtandao wa barabara za lami wa kilomita 51.2 katika mji wa Serikali Mtumba 'Magufuli City' ambao unagharimu Sh bilioni 87.9.

Akizungumza mara baada ya kukagua mtandao wa barabara za lami katika mji huo ikiwa ni Uzinduzi wa Wiki ya Maadhimisho ya Miaka 60 ya Uhuru ameonesha kuridhishwa na kazi iliyofanyika na kuipongeza Ofisi ya Rais-TAMISEMI na TARURA kwa kazi nzuri.

Waziri Mkuu, Mhe. Majaliwa pia amezindua awamu ya pili ya ujenzi wa majengo ya Serikali katika Mji wa Serikali.

" Barabara ni nzuri  na zinaakisi Mji wa Serikali, pongezi kwa Ofisi ya Rais Tawala za Mikoa na Serikali za Mitaa (TAMISEMI) na  Wakala wa barabara Vijijini na Mijini. Nimesikia kazi ambazo zimefanyika na ambazo bado zinaendelea kufanyika, hivyo endeleeni kusimamia kazi hii Ili ikamilike kwa wakati na kwa viwango vinavyotakiwa."

" Nimefurahi mmeweza kutenganisha njia ya magari na watumishi wengine, hatua hii itasaidia kuepusha ajali katika barabara hizi. "

Aidha, Mhe. Majaliwa amewaagiza TARURA kutumia ubunifu huu katika njia mbazo wanasimamia ujenzi wake katika maeneo mbalimbali ili kupunguza ajali.

Awali, Mtendaji Mkuu wa Wakala wa Barabara za Vijijini na Mijini(TARURA) Mhandisi , Victor Self alisema ujenzi wa Barabara za lami ni utekelezaji wa maagizo ya Serikali iliyotolewa Aprili 13 mwaka 2019  wakati wa uzinduzi wa mji wa Serikali kwa lengo likiwa ni kupunguza adha ya usafiri kwa watumishi hususani wananchi wanaofuata huduma katika Ofisi za Serikali.

Amesema mradi huo upo katika maeneo mawili ikiwa ni eneo la kaskazini Ofisi ya ubalozi wa Marekani na Serikali ya mapinzudi Zanzibar  na eneo la Kusini ambalo zipo Ofisi za Serikali na ofisi za mabalozi mbalimbali.

Amesema mradi huu unajumuisha ujenzi wa mtandao wa barabara za lami  kilomita 51.2 na kati ya hizo kilomita 11 imejenga kwa lami nzito na kilomita 11. 2 ni njia nne  na kilomita 28.2 zenye njia mbili.

Pia kutakuwa na njia za waenda kwa miguu, waendesha pikipiki na baiskeri kila upande, eneo kwa ajili huduma za majisafi na majitaka, umeme TEHAMA ambapo pia kutakuwa na mtandao wa mifereji yenye kilomita 94.5, karavati 100, madaraja 10 na taa za kuongeza magari.

" Pia katikati ya barabara tumetenga eneo la mita 9 Kwa ajili ya ujenzi wa mwendokasi na treni ya abiria hapo baadaye."

Amesema ili kukabiliana na Maji Katia eneo hilo, TARURA inajenga maeneo mawili yankukusanyia maji ambapo eneo Mona litakuwa na uwezo wa kuhifadhia maji mita za ujazo 9000 na eneo lengine la ujazo mita za ujazo 14,000.

Mhandisi Self amesema  mpaka sasa kazi imefikia asilimia 88 na unatarajia kukamilika Desemba 30 mwaka huu na tayari mkandarasi amelipwa Sh bilioni 61.7 sawa na asilimia 77 wakati Makandarasi mshauri amelipwa Sh bilioni 755 sawa na asilimia 80 ya malipo.