Wakuu wa Mikoa waaswa kusimamia miradi, kutatua kero za wananchi

Imewekwa tar.: March 17th, 2024

Na. Fred Kibano, Dodoma

Waziri wa Nchi Ofisi ya Rais, Tawala za Mikoa na Serikali za Mitaa Mhe. Mohamed Mchengerwa amewataka Wakuu wa Mikoa na Makatibu Tawala wa Mikoa kote nchini kusimamia utekelezaji wa miradi ya maendeleo na utatuzi wa kero za wananchi.

Mhe. Mchengerwa alitoa kauli hiyo katika ukumbi wa Tume ya Taifa ya Uchaguzi Njedengwa Jijini Dodoma tarehe 16 Machi, 2024 wakati akihitimisha kikao kazi cha kujadili Sura ya Mipango na Bajeti ya Ofisi ya Rais-TAMISEMI, Tume ya Utumishi wa Walimu, Sekretarieti za Mikoa na Mamlaka za Serikali za Mitaa kwa Mwaka wa fedha 2024/25.

 “Pamoja na mafanikio makubwa ya matumizi ya Force Account unahitajika usimamizi madhubuti. Yapo maeneo yaliyofanya vizuri sana kupitia utaratibu huo lakini pia yapo maeneo ambayo utekelezaji wake si wa kuridhisha. Hivyo, ninahitaji mkasimamie vizuri fedha za miradi inayoletwa na Serikali katika maeneo yenu. Hakikisheni mnaendelea kufuatilia na kukagua kila hatua ya miradi. Msisubiri hadi mambo yaharibike ndipo muunde timu za uchunguzi kwani utakuwa hujasaidia kitu bali utaongeza gharama za uendeshaji kwa Serikali’ Mhe. Mchengerwa.   

Aidha, Mhe. Mchengerwa amewataka viongozi hao kusimamia ukusanyaji wa mapato ya ndani ya Halmashauri kwani ni kipambele cha Serikali ikiwa ni pamoja na matumizi ya mifumo ya kielektroniki katika ukusanyaji wa mapato na wao kama viongozi hawana budi kuisimamia kwa weledi. Kwani matumizi ya mifumo hiyo imeonesha mafanikio makubwa katika kuongeza mapato ya Serikali yaliyokuwa yakipotea kutokana na watumishi wasio waaminifu.

“mkakati wetu wa kujitegemea kibajeti unategemea uwezo wetu wa kukusanya mapato ya ndani. Simamieni kikamilifu makusanyo ya mapato kwenye maeneo yenu kwa kutumia mashine za kielektroniki” alisema Mhe. Mchengerwa.

Amesema kuna baadhi ya watendaji na watumishi wanaohusika na masuala ya fedha wamekuwa wakisaidia kuchapusha fedha nje ya mfumo wa fedha halali kwa kuzima mashine za kielektroniki na mapato kuingia kusiko husika na kwamba suala hili ni kuihujumu Serikali na halikubaliki na wao kama viongozi wa mikoa wanatakiwa kulisimaia kwa nguvu zote.  

Kwa upande wake Katibu Mkuu Ofisi ya Rais TAMISEMI Adolf Ndunguru akitoa maelezo ya awali amewashukuru Waheshimiwa Wakuu wa Mikoa kwa kazi nzuri wanazozifanya katika mikoa yao lakini pia amesema lengo la kikao kazi hicho ni kujadili utekelezaji wa mipango na bajeti kwa mwaka uliopita 2022/2023 na pia kupata mwelekeo wa utekelezaji wa mwaka ujao 2024/2025, lengo pia likiwa ni kujenga uelewa wa pamoja kwa maana ya ufahamu wa vipaumbele vya Taifa na mikoa katika mwaka 2024/2025.  

Kikao kazi hicho kimehudhuriwa na Wakuu wa Mikoa, Makatibu Tawala wa Mikoa, Wakuu wa Taasisi zilizopo chini ya Ofisi ya Rais TAMISEMI, Wakurugenzi wa Ofisi ya Rais TAMISEMI, baadhi ya Wizara za kisekta na baadhi ya Maafisa wa Ofisi ya Rais TAMISEMI.