UJENZI WA MRADI WA BRT UTUMIKE KURITHISHA UTAALAM

Imewekwa tar.: June 17th, 2023

OR-TAMISEMI

MWENYEKITI wa Kamati ya Kudumu ya Bunge ya Tawala za Mikoa na Serikali za Mitaa Mhe.Denis Londo amesema ujenzi wa Mradi wa Mabasi Yaendayo Haraka (DART) utumike kuhamisha utaalam kutoka kwa watalaam wa nje ya nchi na kujengea uwezo wataalam wa ndani.

Mhe.Londo ameyasema hayo mapema leo tarehe 17.06.2023 wakati wa ziara ya Kamati hiyo ilipotembelea DART kujionea maendeleo ya ujenzi wa miundombinu ya DART awamu ya tatu.

'Mradi huu ni mkubwa  na unatekelezwa na mkandarasi kutoka nje ya nchi yamkini kuna ujuzi mwingi unaotumika ambao watalaam wetu wa ndani hawakua nao  na wafanyakazi wengi wa hapa ni wenyeji hivyo tuweke mpango wa kuhakikisha ule ujuzi kutoka nje unabaki kwa wazawa na ili na wao waweze kuendeleza miradi mingine itakayofuata."

"Ni vyema tukaweka mpango huu kwenye utekelezaji wa kazi hii watalaam wa Dart wanufaike lakini na wa taasisi zetu kama TARURA na TANROAD pia wahusishwe kwa wote wanahusika na ujenzi wa miundombinu."

"Si jambo jema mkandarasi huyu akiondoka tushindwe hata kufanya matengenezo ya miundombinu hii kwa sababu tu hatuna utalaamu hili jambo ni muhimu na litekelezwe kwa mipango ya mapema."

Akizungumza katika ziara hiyo Waziri wa Nchi Ofisi ya Rais-TAMISEMI, Mhe. Angellah Kairuki aliishukuru Kamati kwa kutembelea  DART na kuwa Wizara imechukua mapendekezo na kuyafanyia kazi.

Naye Kaimu Mkurugenzi wa DART, Eng. Fanuel Kalugendo amesema  ujenzi wa awamu ya tatu ya mradi inahusisha barabara zenye urefu wa kilomita 23.3; ambazo ni barabara ya Azikiwe toka posta ya zamani, Bibi Titi, Nkurumah, Nyerere hadi Gongolamboto. 

“Aidha awamu hii inahusisha barabara za Nelson Mandela, Uhuru, Shaurimoyo, Lindi hadi kituo kikuu cha Kariakoo (Terminal). Vilevile, awamu hii inahusisha ujenzi wa Karakana na maegesho ya mabasi eneo la Gongo la Mboto."