Uboreshaji wa huduma za afya ya msingi ni chachu ya kuimarisha uchumi wa kati

Imewekwa tar.: August 3rd, 2020

Waziri wa Nchi Ofisi ya Rais Tawala za Mikoa na Serikali za Mitaa Mhe. Selemani Jafo amesema kuwa uboreshaji wa Huduma ya Afya msingi ni nguzo muhimu katika kuimarisha uchumi wa kati kwa kuwa  afya za watanzania ndio chachu ya kuongeza juhudi katika kufanya kazi ili kuinua uchumi wa Taifa.

Ameyasema hayo leo wakati akiwasilisha mrejesho kwa watanzania mafanikio ya miaka mitano ya maboresho ya huduma za afya Msingi katika Mamlaka za Serikali za Mitaa iliyofanyika katika ukumbi wa LAPF Jijini Dodoma.

Mhe. Jafo amejikuta akibubujikwa na machozi namna wananchi walivyo kuwa wakipata adha na kupoteza maisha kutoka na ukosefu wa huduma za afya kwenye baadhi ya maeneo nchini jambo lililokuwa linadhohofisha afya za wananchi katika utafutaji wao kutokana na kutokuwa na afya imara.

Amesema kuwa wananchi wengi wamekuwa  wakipoteza maisha kutokana na kukosa huduma bora za afya, lakini kwa kipindi cha miaka mitano ya Serikali chini ya Rais John Pombe  Magufuli imetoa kipaumbele kwa sekta hiyo na kuondoa adha kwa wananchi  hivyo kuchagiza katika utafutaji wa kipato .

“Watu wenye uwezo hawafahamu  kuwa kuna baadhi ya wananchi  walikuwa wakiteseka  kupata huduma za afya,  na walikuwa  wanasafiri zaidi ya kilometa  140  kutafuta huduma, wamama wajawazito walikuwa wakipata matatizo  ya fistula, baada ya kupata uchungu kwa muda mrefu hali hii ilisababisha vifo vingi katika jamii” ameeleza Mhe. Jafo.

Akiongelea kuhusu mafanikio yalipyopatikana katika utoaji wa huduma za afya ya msingi hasa katika ngazi za Mamlaka za Serikali za Mitaa Mhe. Jafo amesema  tangu uhuru  kulikuwa na hospitali 77 katika Halmashauri 185 jambo ambalo lilikuwa likilalamikiwa na wananchi kwa muda mrefu kuhusu  miundombinu ya Afya nchini.

Amewashukuru wataalam wa afya nchini  kwa kuhakikisha wanafanyakazi kwa weledi  na  “kuwa  injini ya kuhakikisha  wanatoa huduma bora kwa jamii na kupunguza changamoto zilizokuwepo awali na kupunguza malalamiko kwa wananchi.

Mhe. Jafo amefafanua kuwa baada ya kukarabati na kujenga vituo vya afya nchini  wakinamama wajawazito waliojifungua katika vituo hivyo vipya ni  219,764  na waliopata huduma ya upasuaji ni 18,826.na wagonjwa wengine zaidi ya 6000 walifanyiwa  upasuaji wa kawaida.

Aidha, katika siku ya afya ya TAMISEMI  Mhe Jafo aliweza kutembelea kituo cha afya  cha Makole, Jijini Dodoma  na kutoa zawadi  kwa wajawazito waliojifungua  katika kituo hicho kama ishara ya kuwapongeza kwa kuweza kupata huduma kwenye vituo vilivyokarabatiwa na kujengwa na Serikali.

Awali, Mwakilishiwa Katibu Mkuu Wizara  ya Afya,  Maendelo  ya Jamii, Jinsia, Wazee na Watoto, Dk.Grace Maghembe, amesema kuwa kuna mikoa mitano ambayo haikuwa na  hospitali  za rufaa za Mikoa, lakini kwa sasa zimejengwa na zinatoa huduma katika ubora wa hali ya juu.

“Uboreshaji wa huduma za afya ikiwemo za kibingwa nchini umechangia kupunguza idadi ya wagonjwa wa kupelekwa nje ya nchi”, amesisitiza Maghembe.

Kwa upande wake  Naibu Katibu Mkuu anayeshughulikia Afya katika Ofisi ya Rais TAMISEMI, Dk.Dorothy Gwajima amesema kuwa uwepo wa miundombinu hiyo inatakiwa kwenda  sambamba   na utoaji wa huduma bora kwa wananchi ili kuwa vutia watanzania wengi zaidi kujiunga na Mfuko wa Afya ya Jamii iliyoboreshwa(CHF).

Na Angela Msimbira OR-TAMISEMI