TAMISEMI yajivunia mafanikio makubwa ndani ya miaka minne

Imewekwa tar.: February 4th, 2020

Ofisi ya Rais, Tawala za Mikoa na Serikali za Mitaa(OR-TAMISEMI), imetaja mafanikio sita yaliyopatikana kwa kipindi cha miaka minne huku ikisema tatizo la usafiri kwa wakazi wa Jiji la Dar es Salaam wanaotumia mabasi ya mwendokasi itamalizika Julai mwaka huu.

Kauli hiyo ilitolewa mwishoni wiki na Waziri wa Nchi, Ofisi ya Rais, Tawala za Mikoa na Serikali za Mitaa Mhe. Selemani Jafo,wakati alipokuwa akizungumzia mafanikio ya wizara hiyo katika kipindi cha miaka minne ya uongozi wa Rais John Magufuli, Jijini Dodoma.

Ametaja mafanikio hayo kuwa ni ujenzi wa miundombinu ya barabara, Hospitali za wilaya na vituo vya afya, Mpango wa elimu bure, ukusanyaji mapato, ujenzi wa viwanda vidogo, utoaji mikopo kwa vijana, wanawake na watu wenye ulemavu, ujenzi wa miradi mikakati, ujenzi wa miundombinu ya barabara  na mradi wa mabasi yaendayo kasi.

Mhe. Jafo amesema ujenzi wa miundombinu ya barabara unaofanywa na Wakala wa Barabara Mijini na Vijijini(Tarura) umekuwa na mafanikio makubwa na kurahisisha usafiri kwa wananchi.

Amebainisha kuwa katika eneo hilo, kumekuwepo na miradi ya kimkakati kwa majiji na manispaa ambapo zaidi ya Sh.Bilioni 840 zinatumika kujenga barabara, masoko, stendi za kisasa, mitambo na madampo ya taka.

Akizungumzia sekta ya afya, amesema kabla ya uongozi wa Rais Magufuli kulikuwa na vituo vya afya 115 lakini serikali imejenga vituo 352 ambavyo vina uwezo wa kufanya upasuaji.

“Pia zimejengwa hospitali za wilaya 69 na mwaka huu wa fedha zitajengwa zingine 27 kwa kupitia utaratibu wa ‘force account’,”Amesema Mhe. Jafo.

Kuhusu sekta ya elimu, Jafo amesema  kila mwezi serikali inatoa Sh.Bilioni 23.86 kugharamia elimu bila malipo.

“Pia tumeboresha shule kongwe ambazo zilikuwa zimechakaa na kwa wastani wa Sh.Milioni 800 hadi Sh.Bilioni 2 kwa kila shule zinatumika kukarabati,pia miundombinu ya shule za msingi na sekondari imejengwa na inaendelea kujengwa,”amesema

Kadhalika, amesema tayari  Serikali imeweka sheria kwa ajili ya utoaji mikopo ya vijana, wanawake na watu wenye ulemavu ambapo asilimia 10 ya mapato ya ndani yanatumika kwa ajili hiyo na mabilioni ya fedha yametolewa kwa makundi hayo.

Mhe. Jafo amesema kwenye ujenzi wa viwanda vidogo, lengo lilikuwa kila mkoa kuwa ni viwanda 100 lakini hadi kufikia Desemba 2018 viwanda 4,877 sawa na asilimia 186.75 vilikuwa vimejengwa.

Akizungumzia ukusanyaji wa mapato, amesema serikali imeanzisha mifumo ya ukusanyaji mapato kwa njia ya kielektroniki  ambapo kumeleta mapinduzi makubwa kwenye makusanyo na kuwepo na uadilifu.

Kuhusu Mabasi yaendayo kasi Mhe Jafo amesema tatizo la usafiri kwa wananchi litamalizika baada ya mzabuni mpya wa kuendesha mradi kupatikana.

“Shida inayojitokeza sasa ni upungufu wa mabasi ambapo yanayofanyakazi ni 140 kati ya mabasi 305 yanayohitajika, mzabuni mpya ataleta mabasi yote 305 yanayohitajika kutoa huduma ya usafiri,”amesema

Amesema  ifikapo Julai hadi Agosti mwaka huu, shida hiyo itamalizika baada ya serikali kumpata mzabuni huyo huku akisema awamu ya pili ya ujenzi wa miundombinu ya mradi huo kwenda Mbagala imekwishaanza, na itafuatiwa na awamu ya tatu kwa ajili ya mabasi ya mwendokasi kuelekea Gongo la Mboto.

Aidha ,amesema kupitia mradi wa uboreshaji miundombinu Jiji la Dar es Salaam (DMDP) barabara za mitaa zinazojengwa zitakuwa kiungo muhimu na zile za mwendokasi.

Na Angela Msimbira OR-TAMISEMI