Serikali yaridhishwa na kasi ya ujenzi kituo cha afya Bunju

Imewekwa tar.: August 16th, 2020

Katibu Mkuu Ofisi ya Rais Tawala za Mikoa na Serikali za Mitaa Mhandisi Joseph Nyamhanga  ametoa maelekezo kwa Halmashauri ya Manispaa ya kinondoni  kukamilisha upanuzi zahanati ya Bunju  ambayo imepandishwa hadhi na  kuwa Kituo cha Afya ifikapo  Septemba 20, 2020  ili kiweze kuanza kutoa huduma kwa wananchi

Ameyasema hayo leo  kwenye ziara ya kikazi ya kukagua  maendeleo ya miradi inayotekelezwa katika Halmashauri ya Manispaa ya Kinondoni , Jijini Dar-Es Salaam

Akikagua ujenzi huo Mhandisi Nyamhanga amesema Serikali imetoa shilingi milioni 600 kwa ajili ya  upanuzi wa zahanati hiyo ili kukipandisha hadhi  na  kuwa kituo cha afya lengo likiwa ni kupunguza msongamano katika Hospitali ya Mwananyamala.

“Kumekuwa na msongamano mkubwa katika Hospitali ya Mwananyamala, kwa kuliona hilo Serikali iliamua kupandisha hadhi zahanati ya bunju na kuwa Kituo cha afya, hivyo Halmashauri inawajibu wa kuhakikisha wanasimamia kikamilifu ujenzi ili uweze kukamilika kwa wakati na kuaza kutoa huduma kwa jamii.”amesema Mhandisi Nyamhanga

Amesema kuwa zahanati hiyo kwa sasa inahudumia wananchi 65,000 hivyo kopandishwa kuwa kituo cha afya kitaweza kutoa huduma kwa zaidi ya  wananchi  laki moja  katika kata ya Bunju, na maeneo ya jirani na kuboresha huduma za afya karibu na wananchi

Mhandisi Nyamhanga anafafanua kuwa Serikali imewekeza kwenye miundombinu ya kutolea huduma ya afya, hivyo niwajibu wa wataalam wa afyanchini  kuhakikisha wanatoa huduma bora za kwa jamii ili kupunguza malalamiko.

Naye Mganga Mkuu wa Mkoa wa Dar-es-salaam Dkt. Rashid Mfaume amesema kituo hicho kikikamilika kitasaidia kupunguza msongamano kwenye Hospitali ya Mwananyamala ambapo kwa sasa wakazi wengi wa maeneo hayo hufuata huduma katika Hospitali hiyo.

Dkt. Mfaume amesema kituo hicho kitaweza kusaidia wananchi wa maeneo ya jirani kuja kupata huduma na kuwapunguzia adha wananchi  ya kutembea umbali mrefu kufuata huduma katika hospitali za rufaa

Ameyataja majengo yanayojengwa kuwa ni jengo la mionzi, jengo la Mama na Mtoto, Maabara jengo la upasuaji na jengo la kuifadhia maiti ambapo yakikamilika kituo hicho kitaweza kutoa huduma ya upasuaji wa dharura na kuongeza mapato ya kituo hicho

Aidha Mhandisi Nyamhanga katika ziara yake katika Halmashauri ya Manispaa ya Kinondoni, Jijini Dar-es-salaam alikagua ujenzi wa Madarasa katika shule ya Msingi ya ndumbwi, na zahanati ya  Ndumbwi ambayo nayo imepandishwa hadhi na  kuwa kituo cha afya

Ikumbuke kuwa katika kipindi cha miaka mitano  chini ya uongozi wa Rais wa Jamhuri ya Muungano wa Tanzania Mhe John Pombe Magufuli  Serikali imejenga Hospitali za Halmashauri 99,  vituo vya afya 487  na zahanati 1, 198  kwa lengo la kuboresha miundombinu ya kutolea huduma ya afya nchini

Na Angela Msimbira  DAR-ES-SALAAM