Serikali na Wadau Wajenga Viwanda 4,777 ndani ya Mwaka mmoja

Imewekwa tar.: March 20th, 2019

Waziri wa Nchi Ofisi ya Rais Tawala za Mikoa na Serikali za Mitaa (OR - TAMISEMI) Mhe. Selemani S.Jafo amesema jumla ya viwanda 4,777 vimekwisha anzishwa nchini hadi kufikia tarehe 31 Desemba, 2018 sawa na asilimia 183.73 ya lengo kujenga viwanda 2,600 katika mikoa yote.

Waziri Jafo ametoa kauli hiyo wakati akipokea taarifa ya utekelezaji wa ujenzi wa viwanda 100 kwa kila mkoa kuishia Disemba, 2018 katika kikao kilichofanyika katika ukumbi wa Hazina Jijini Dodoma.

Mafanikio hayo yanakuja baada ya uzinduzi wa Kampeni ya ujenzi wa viwanda katika Mikoa na Mamlaka za Serikali za Mitaa kote nchini ikiwa na kaulimbiu ya ‘Mkoa wetu, Viwanda vyetu’ ambayo aliitoa rasmi Novemba, 2017 katika chuo cha Mipango Dodoma.

Jafo amesema ni uamuzi wa Serikali ya awamu ya Tano wa kujenga uchumi wa viwanda unalenga kuleta maendeleo jumuishi na endelevu kwa kutumia ipasavyo rasilimali zilizopo na hivyo kuchangia katika kukuza Pato la Taifa, kutoa nafasi nyingi na endelevu za ajira, kuzalisha na kukuza teknolojia zinazohitajika na kuwa chachu ya maendeleo ya sekta zinazohusiana na kuzalisha bidhaa bora kwa ajili ya masoko ya ndani na nje ya nchi.

Viwanda vikubwa vilivyojengwa Nchini kwa muda wa mwaka mmoja ni Viwanda 108, Viwanda vya Kati ni 236, Viwanda Vidogo ni 2,422 na Viwanda Vidogo vidogo ni 2,010 ambavyo vyote kwa ujumla vimetoa ajira kwa Wananchi wapatao 36,796

Mkoa wa Dar es Salaam ndiyo Mkoa uliongoza katika ujenzi wa viwanda vikubwa, ikifanikiwa kuanzisha viwanda vikubwa 46 ikifuatiwa na Mkoa wa Pwani iliyojenga viwanda vikubwa 8. Mikoa ya Mwanza, Lindi na Simiyu yote kwa pamoja imeshika nafasi ya tatu kwa kufanikiwa kujenga viwanda vikubwa 7 kila Mkoa.

Mkoa wa Geita umeongoza katika ujenzi wa Viwanda vya Kati ukiwa umefanikiwa kuanzisha Viwanda vya Kati 57 ikifuatiwa na Mkoa wa Mbeya iliyojenga Viwanda vya Kati 40.  Mkoa wa Pwani umeshika nafasi ya tatu kwa kufanikisha kujenga Viwanda 21 vya kati.  Aidha, Mkoa wa Dar es Salaam umeongoza katika ujenzi wa Viwanda vidogo kwa kufanikiwa kuanzisha Viwanda vidogo 245 ikifuatiwa na Mkoa wa Pwani yenye kuanzisha Viwanda vidogo 219 na ya tatu ni Dodoma yenye Viwanda 196.

Mkoa wa Lindi umeongoza katika ujenzi wa Viwanda vidogo Vidogo kwa kuanzisha Viwanda vipatavyo 452 ikifuatiwa na Mkoa wa Mara yenye kuanzisha Viwanda vidogo vidogo 377 na Mkoa wa tatu ni Mkoa wa Dar es Salaam ambao umefanikiwa kujenga Viwanda  vidogo vidogo 180.

Vile vile ameagiza mikoa ambayo haikufikia lengo la viwanda 100 licha ya kufanya vizuri katika kutekeleza azma ya Serikali ya Awamu ya Tano kwa kujenga viwanda vingi.

Waziri Jafo amesema ametoa muda hadi kufikia mwezi Juni mwaka huu mikoa hiyo iwe imefikia malengo yaliyokusudiwa la sivyo ataitaja hadharani kwa kushindwa kufikia malengo ya Serikali ya Awamu ya Tano kupitia mpango wa maendeleo wa miaka mitano 2016/17 hadi 2020/21 ambapo kwa Ofisi ya Rais TAMISEMI iliweka mkakati wa viwanda 100 kila mkoa ili kusaidiana na wizara ya Viwanda na Biashara kuelekea uchumi wa kati na Tanzania ya Viwanda.

Katika hatua nyingine, Jafo amezitaja changamoto zilizokwamisha jitihada za Serikali na wadau katika kuendeleza Sekta ya Viwanda hususan Viwanda vidogo na vya kati kuwa ni pamoja na upimaji wa ardhi kwa ajili ya uwekezaji, upatikanaji wa maji ya uhakika, upatikanaji wa nishati ya umeme wa uhakika, miundombinu ya barabara na upatikanaji wa vifungashio kwa gharama nafuu.

Kwa upande wake Mkuu wa Mkoa wa Tabora Aggrey Mwanri ambaye ni mwakililishi wa Wakuu wa Mikoa Tanzania Bara, amesema maagizo yote yaliyotolewa na Serikali wameshayachukua na watayafanyia kazi mara moja ili kufikia azma ya Serikali ya Awamu ya Tano.

                        Anaandika Fred Kibano