Sera ya Ugatuaji wa Madaraka Kuipaisha Sekta ya Uvuvi nchini

Imewekwa tar.: September 27th, 2022

Na Fred Kibano, Dodoma

Ushirikiano wa kisekta baina ya Ofisi ya Rais TAMISEMI na Wizara ya Mifugo na Uvuvi utasaidia kuongeza mazao ya Sekta ya Uvuvi na kuinua uchumi wa wananchi wanaotegemea mazao ya Uvuvi.

Hayo yamesemwa na Bi. Beatrice Kimoleta, Mkurugenzi wa Tawala za Mikoa Ofisi ya Rais TAMISEMI wakati akifungua kikao kazi cha Wakurugenzi na Wataalam kilichofanyika kati ya Ofisi ya Rais TAMISEMI na Wizara ya Mifugo na Uvuvi Jijini Dodoma mapema leo.

Bi. Kimoleta amesema lengo la kikao kazi hicho ni kutekeleza maelekezo ya Viongozi Wakuu wa Wizara hizo ambao waliwaeleza wataalam kukaa na kuweka mikakati ili kuwa na usimamizi wa pamoja wa Sekta ya Uvuvi kwa kuongeza mchango wa sekta hiyo kwenye mapato ya Serikali, kukuza uchumi na kipato cha Wananchi kwenye maeneo wanayojishughulisha na shughuli za uvuvi.

Aliendelea kueleza kuwa lengo pia ni kuhakikisha Mipango inayoandaliwa na Wizara hizi mbili inakuwa shirikishi na inayolenga kutatua changamoto zinazoikabili sekta hiyo.

Naye Mhandisi Enock Nyanda Mkurugenzi Msaidizi wa Sekta za Uchumi na Uzalishaji, Ofisi ya Rais TAMISEMI amesema maazimio ya kikao kazi hicho yataisaidia  Ofisi ya Rais TAMISEMI  ambaye ni mtekelezaji  wa Sera kwenye Mikoa na Halmashauri na Wizara ya Mifugo na Uvuvi ambaye ni mtunga Sera kuona namna ambavyo mikopo ya asilimia 10 inavyoweza kutumika kuunda vikundi vitakavyojishughulisha na shughuli Uvuvi katika Halmashauri ili kuongeza tija ya Mikopo hiyo, kukuza ajira na kuinua uchumi wa wananchi wa eneo husika.

Kwa upande wake Antony Dadu Mkurugenzi Msaidizi wa Huduma za Ugani wa Uvuvi na Ukuzaji Viumbe maji amesema Serikali inatarajia kununua boti 160 na kuwapatia wavuvi nchini kama Mpango wake wa kukuza Sekta hiyo. Amesema kuwa boti hizo ziendazo kasi zitakuwa na ukubwa tofauti wa mita 14, mita 12 na mita 10, pia kifaa cha kutambua samaki walipo, kasha la kuhifadhia samaki hadi tani moja na nusu, makoti ya kujiokoa na zana za kuvulia.

Aidha, amesema boti hizo zitapelekwa kwenye maeneo ya kimkakati ambayo yana kina kirefu cha maji na hali ya hewa inayowasumbua wavuvi.

Akifunga, Kikao hicho  Prof Mohamed Sheikh Mkurugenzi wa Utafiti, Mafunzo na Huduma kutoka Wizara ya Mifugo na Uvuvi ameeleza kuwa ushirikiano wa karibu wa Wizara hizi utasaidia Mikakati ya kuleta Mapinduzi ya Sekta ya Uvuvi kufikiwa kwa haraka ambayo  ni pamoja na Ujenzi wa miundombinu ya uvuvi kama mabwawa, ujenzi wa mashamba darasa kuwezesha ufugaji wa samaki kwenye vizimba, mafunzo kwa wakulima wa mwani, ujenzi wa masoko ya kimkakati, ununuzi wa boti na kusimamia miradi ambayo imebuniwa na Halmashauri katika asilimia 5 fedha wanazopaswa kutenga kutoka katika mapato yatokanayo na shughuli za uvuvi.

Kikao hicho kilihitimishwa kwa kukubaliana kuhakikisha uandaaji wa Mipango na Bajeti ya Halmashauri katika sekta ya Uvuvi unakuwa wa kimkakati ili kuongeza mapato na kuinua uchumi wa wananchi wa eneo husika.