Sera Mpya ya Ugatuaji wa Madaraka kurahisisha utoaji wa huduma kwa Wananchi

Imewekwa tar.: April 1st, 2019

Na Mathew Kwembe, Mbeya

Serikali imesema kuwa Sera Mpya ya Ugatuaji wa Madaraka inalenga kuwezesha raslimali zake zishuke moja kwa moja kwenye halmashauri na vituo vya kutolea huduma kwa wananchi.

Akizungumza mara baada ya kufunguliwa kwa kikao kazi cha kupokea maoni ya wadau juu ya rasimu ya sera ya Taifa ya ugatuaji wa madaraka ya mwaka 2019 kwa wananchi wa mikoa ya Mbeya, Iringa, Njombe, Rukwa na Songwe leo jijini Mbeya, Kaimu Mkurugenzi wa Idara ya Uratibu wa Kisekta kutoka Ofisi ya Rais Tawala za Mikoa na Serikali za Mitaa bwana Juma Idd amesema kuwa rasimu ya sera hiyo imejielekeza moja kwa moja kwao kwa sababu ndiyo wanaoelewa mahitaji ya msingi ya maeneo yao.

Amesema ili kuwezesha utoaji huduma kwa wananchi kwa ufanisi, sera mpya ya ugatuaji wa madaraka imebainisha majukumu kwa kila taasisi ambapo Wizara za kisekta zitakuwa na jukumu la kutafuta raslimali, Ofisi ya Rais Tawala za Mikoa na Serikali za Mitaa itaendelea na jukumu la uratibu na usimamizi wa raslimali hizo na kuhakikisha kuwa zinashuka moja kwa moja katika ngazi za Mikoa, Halmashauri na Vituo vya kutolea huduma za afya.

Bwana Idd amesema kuwa, kwa kufanya hivyo, wananchi waliopo kwenye vituo vya kutolea huduma wataweza kupanga, kusimamia utekelezaji wa raslimali hizo na kuzitolea taarifa.

Mkurugenzi Idd ameongeza kuwa rasimu ya sera mpya ya Ugatuaji wa Madaraka inalenga kuboresha sera ya sasa ya Ugatuaji wa Madaraka ambayo ilitayarishwa mwaka 1998 ili iweze kuendana na mazingira ya sasa ya utendaji kazi katika Ofisi ya Rais TAMISEMI.

“Mfano mzuri wa rasimu hii ni kuona sekta za afya na elimu ambapo wizara husika zimepeleka raslimali za kutosha, ngazi za halmashauri na vituo vya kutolea huduma na matokeo yake ni uboreshwaji mkubwa wa huduma za afya na elimu katika maeneo mengi nchini,”amesema.

Amesema kuwa serikali imeona ni vema viongozi hao wa Mamlaka za Serikali za Mitaa washiriki kwenye kutoa maoni kuhusu rasimu hii ya Sera ya Ugatuaji wa Madaraka kwani ni vizuri kwanza waifahamu rasimu yenyewe lakini pia waweze kuiboresha endapo ina mapungufu na kuondoa vitu ambavyo hawavihitaji kuwemo kwenye sera hiyo.

Mapema akifungua kikao kazi hicho kwa niaba ya Mkuu wa Mkoa wa Mbeya, Mkuu wa Wilaya ya Mbeya mjini Mheshimiwa Paul Ntiniki ametaja mafanikio na changamoto mbalimbali  za utekelezaji wa ugatuaji madaraka katika kipindi kilichopita ambapo ameeleza kuwa mafanikio na changamoto hizo zinatofautiana kwenye maeneo tofauti ya Mamlaka za Serikali za Mitaa. 

“Kwa ujumla wake, hatujafikia kiwango cha mafanikio kilichotarajiwa kutokana na changamoto mbalimbali zilizojitokeza na ndio maana Serikali yetu imeamua kufanya mapitio ya Sera ya Taifa ugatuaji ili kukabiliana na changamoto zilizojitokeza,” ameeleza

Mhe.Ntiniki ameelezea matarajio yake kuona kwamba ushauri, maoni na mapendekezo ya washiriki yataboresha Rasimu ya awali ya Sera ya Taifa ya ugatuaji wa madaraka itakayowasilishwa na wataalam Washauri.

“Maoni na mapendekezo yenu ni muhimu sana katika kuandaa Sera mpya itakayoboresha utekelezaji wa ugatuaji madaraka nchini kwa ufanisi zaidi na kwa maendeleo ya wananchi wetu,” amesema.

Kikao hicho  cha siku mbili kimewahusisha Wakuu wa Wilaya, Wabunge, Mameya na Wenyeviti wa Halmashauri, Wakurugenzi kutoka katika Mamlaka za Serikali za Mitaa, Makatibu Tawala wa Wilaya, Viongozi wa dini na Washiriki kutoka Asasi za Kiraia kutoka mikoa ya Mbeya, Iringa, Njombe, Rukwa na Songwe.