Nzunda ataka Halmashauri ziimarishe vitengo vya ukaguzi wa ndani

Imewekwa tar.: March 19th, 2019

Na Majid Abdulkarim na Mathew Kwembe

Serikali imewataka watendaji wa Mamlaka za Serikali za Mitaa kuimarisha uwezo wa ofisi za Wakaguzi wa ndani ili waweze kusaidia jukumu la usimamizi thabiti wa fedha za umma.

Agizo hilo limetolewa leo na Kaimu Katibu Mkuu Ofisi ya Rais Tawala za Mikoa na Serikali za Mitaa bwana Tixon Nzunda katika Chuo cha Serikali cha Serikali za Mitaa Hombolo kilichopo jijini Dodoma wakati wa ufunguzi wa kikao kazi cha kupokea na kuhakiki taarifa za majibu na mipango kazi ya utekelezaji wa hoja na mapendekezo ya Mdhibiti na Mkaguzi Mkuu wa Hesabu za Serikali kwa Hesabu za Mamlaka za Serikali za Mitaa kwa mwaka wa fedha 2017/2018.

Bwana Nzunda amesema kuwa ni wajibu wa Wakurugenzi wa Halmashauri kama Maafisa Masuuli kuhakikisha kuwa wanaimarisha ofisi za wakaguzi wa ndani kwa kuwajengea mazingira mazuri ya kufanya kazi, kuwapa raslimali watu wa kutosha na raslimali fedha.

“Mkaguzi wa ndani ni kioo cha taasisi yetu, Mkurugenzi bora hawezi kukosa kuzungumzia misingi ya utawala bora, ambayo ni pamoja na kuhakikisha kuwa anajenga misingi thabiti ya usimamizi wa fedha za umma,” amesema bwana Nzunda.

Amesema kwa mujibu wa kifungu cha sheria ya fedha za Serikali za Mitaa Na.9 ya mwaka 1982 pamoja na marekebisho yake, Waziri mwenye dhamana ya serikali za Mitaa amepewa wajibu wa kuhakikisha Mamlaka za Serikali za Mitaa zinakuwa na usimamizi thabiti wa fedha.

Bwana Nzunda ameongeza kuwa taarifa ya Mdhibiti na Mkaguzi Mkuu wa hesabu za serikali zimekuwa zikibainisha kuwa bado kuna tatizo kubwa la halmashauri kutotekeleza mapendekezo ya ukaguzi hasa kwa miaka ya nyuma.

“Taarifa ya CAG kwa mwaka 2016/17 ilibainisha kati ya mapendekezo 12,703 yaliyotolewa mwaka 2015/16 ni mapendekezo 4,262 sawa na asilimia 34 tu ndiyo yaliyotekelezwa kwa ukamilifu,” amesema.

Vile vile bwana Nzunda amesema kati ya maagizo 748 yaliyotolewa na kamati ya LAAC, maagizo yaliyotekelezwa na kukamilika yalikuwa 233 sawa na 31 tu.

Awali akimkaribisha Kaimu Katibu Mkuu kufungua kikao hicho, Mkurugenzi wa Kitengo cha Ukaguzi na Ufuatiliaji wa fedha za Mamlaka za Serikali za Mitaa Bi Miriam Mmbaga amesema kuwa kikao hicho kitafanyika kuanzia tarehe 19-26 Machi, 2019 ambapo kitawahusisha Wakurugenzi, Waweka Hazina na Wakaguzi wa Ndani kutoka Mikoa 26 na Halmashauri zote 185 nchini.

Amesema lengo la kikao hicho ni kuwawezesha Watendaji hao kujibu hoja za CAG, kuongeza uwajibikaji katika utendaji wao wa kazi ili hoja hizo zisijitokeze tena katika halmashauri zao.

Kwa mujibu wa Bi Mmbaga takwimu za taarifa ya Mdhibiti na Mkaguzi Mkuu wa Hesabu za Serikali inaonyesha kuwa katika mwaka wa fedha 2013/14 kati ya hoja 7921 zilizoibuliwa ni hoja 2330 sawa na asilimia 29 ndizo zilizopatiwa majibu.

Kufuatia kuibuliwa kwa hoja hizo za CAG, Ofisi ya Rais TAMISEMI baada ya kupokea maagizo ya Waziri Mkuu iliwataka Wakuu wa Mikoa wasimamie na kujadili utekelezaji wa mapendekezo ya CAG na kuchukua hatua ambapo jumla ya watumishi 203 kutoka Mamlaka za Serikali za Mitaa walichukuliwa hatua za kinidhamu na za kisheria.

Kwa upande wake Mkaguzi wa ndani Mkuu wa Serikali Msaidizi anayeshughulikia Serikali za Mitaa bwana Mwanyika Semroki amesema kuwa ni vyema watendaji wa Mamlaka za Serikali za Mitaa kuhakikisha kuwa wanazingatia udhibiti na usimamizi imara wa fedha za umma hasa kwa kutambua maeneo au miradi iliyo kwenye hatari ya kufanyiwa ubadhilifu.