Mradi wa Fursa na Vikwazo Iliyoboreshwa Kuingizwa kwenye Majukumu ya OR - TAMISEMI

Imewekwa tar.: February 23rd, 2021

Na. Fred Kibano

Serikali imeagiza kuingizwa kwenye majukumu yake kazi zote za mradi wa Fursa na Vikwazo kwa Maendeleo (O & OD) Iliyoboreshwa ili kuhakikisha muendelezo wake unakuwa wenye tija na kuleta maendeleo miongoni mwa jamii ya Watanzania.

Hayo yamesemwa na Mkurugenzi wa Sera na Mipango wa Ofisi ya Rais TAMISEMI Bwana John Cheyo mwishoni mwa wiki wakati akifungua mkutano wa kazi wa pamoja kwenye ukumbi wa Mwalimu Nyerere (JNICC) Jijini Dar es Salaam ambapo alimwakilisha Katibu Mkuu Ofisi ya Rais TAMISEMI Mhandisi Joseph Nyamhanga.

Amewaagiza Mkurugenzi wa Serikali za Mitaa Ofisi ya Rais TAMISEMI Dkt. Charles Mhina na Mkuu wa Chuo cha Serikali za Mitaa Hombolo Dkt. Mpamila Madale kuandaa mipango madhubuti ya mradi huo ambayo itasaidia kuwafikia watumishi wote wa Wizara, Mikoa na Mamlaka za Serikali za Mitaa  ili kuimarisha utekelezaji wa mradi huo.

“Napenda kuchukua nafasi hii kuwaagiza Mkurugenzi wa Serikali za Mitaa Ofisi ya Rais TAMISEMI na Mkuu wa chuo cha Serikali za Mitaa Hombolo (LGTI) kuandaa mipango na miongozo itakayowezesha kuwafikia watumishi wote wa Serikali ili kuimarisha utekelezaji wa Mradi wa Fursa na Vikwazo kwa Maendeleo (O&OD) huku muendelezo wake ukiwekwa kwenye majukumu ya kila siku ya Ofisi ya Rais TAMISEMI, Mikoa na Mamlaka za Serikali za Mitaa”

Amewataka wajumbe kujadili kwa kina mafanikio yaliyopatikana tangu kuanzishwa kwa Mradi wa Fursa na Vikwazo kwa Maendeleo (O & OD Project) mwaka 2015 mpaka unafikia ukomo mwezi Machi, 2021 pamoja na uendelevu wake.

Amesema anajivunia timu nzima ya mradi wa O&OD kwa jitihada zao kwa kufikisha njia na malengo ya mradi kwa ajili ya utoaji bora wa huduma kwa maendeleo ya jamii.

Amesema Ofisi ya Rais TAMISEMI kwa pamoja na Shirika la Maendeleo la Japan (JICA) kuhakikisha walau wanamwacha mtaalamu mshauri mmoja ili kuimarisha muendelezo wa mradi wa Fursa na Vikwazo kwa Maendeleo lakini pia kuendelea kuimarisha uhusiano mzuri uliopo baina ya Tanzania na Japan kupitia Shirika la Maendeleo la Kimataifa (JICA).

Kwa upande wake Bwana Naofumi Yamamura Mwakilishi Mkazi wa JICA ofisi ya TANZANIA ameipongeza Serikali kupitia Ofisi ya Rais TAMISEMI kwa kukamilisha Miongozo ambayo imewasilishwa kupitia vikao kazi kwa Watendaji na Viongozi wa Mikoa 26 na Mamlaka za Serikali za Mitaa 185 na kwamba itasaidia kuendeleza Mfumo wa Fursa na Vikwazo Ulioboreshwa.

Vilevile, Yamamura amesema sehemu ya uendelezaji wa mradi huo itakuwa ni pamoja na Mipango, Bajeti na Tathmini ambayo itainua uwezo wa jamii kushiriki, kuwapa nguvu, kutambua jitihada zao ikiwa ni pamoja na mahusiano baina ya jamii na Serikali.

Mradi wa Fursa na Vikwazo kwa Maendeleo Ulioboreshwa umetekelezwa kwenye Mikoa mitano ya Pwani (Bagamoyo, Chalinze na Kisarawe), Morogoro (Halmashauri ya Mji Ifakara, Ulanga, Mlimba na Halmashauri ya Wilaya ya Morogoro), Dodoma (Kondoa), Kilimanjaro (Siha, Hai na Same) na Singida (Ikungi, Manyoni, Itigi, Mkalama, Iramba, Singida Manispaa na Halmashauri ya Wilaya ya Singida) ambapo lengo lake kuu ni kuijengea uwezo jamii kushiriki shughuli za kujiletea maendeleo kwenye maeneo yao na kwenye sekta mbalimbali kama vile kujenga shule, maghala, ofisi za vijiji, barabara, kilimo na nyinginezo.  

Mkutano huo umewahusisha Wajumbe wa Uratibu wa Mradi wa Fursa na Vikwazo O&OD Ulioboreshwa. Ambao ni Wakurugenzi kutoka Ofisi ya Rais TAMISEMI, Wawakilishi kutoka Wizara ya Fedha na Mipango, Wizara ya Afya, Maendeleo ya Jamii, Jinsia, Wazee na Watoto, Wizara ya Elimu, Sayansi na Teknolojia, Wizara ya Kilimo, Wizara ya Kazi, Vijana, Ajira na Watu wenye Ulemavu. Wengine ni Makatibu Tawala wa Mikoa ya Dodoma, Kilimanjaro, Singida, Pwani na Morogoro, Wakurugenzi wa Halmashauri 18 tajwa hapo juu, Chuo cha Serikali za Mitaa Hombolo, Wawakilishi kutoka JICA waliopo nchini na wale waliopo Tokyo, Japan.