JAFO: Jengeni mahusiano mazuri mahala pa kazi

Imewekwa tar.: March 13th, 2020

Waziri wa Nchi Ofisi ya Rais Tawala za Mikoa na Serikali za Mitaa. Mhe Selemani Jafo amewataka watumishi wa Ofisi ya Rais Tawala za Mikoa na Serikali za Mitaa kujenga mahusiano mazuri mahala pa kazi ili kuweza kutoa huduma bora kwa wananchi.

Ameyasema hayo leo  wakati akifungua Mkutano wa Baraza la Wafanyakazi la Ofisi ya Rais Tawala za Mikoa na Serikali za Mitaa  unaofanyika  katika  ukumbi wa Chuo cha Kilimo cha Sokoine Mkoani Morogoro.

Mhe. Jafo amesema Baraza la wafanyakazi linajukumu la  kupitia mipango  ya maendeleo lakini  linapaswa kujadili kwa kina masuala ya mahusiano kwenye  maeneo ya kazi  kwa kuwa majukumu hayawezi kufanyika vizuri bila kuwa na mahusiano mazuri sehemu ya kazi.

“Hatuwezi kutimiza majukumu yetu bila kuwa na mahusiano mazuri, mahusiano ni jambo  nyeti, na la msingi  mahala pa kazi kwa kuwa  Maeneo ambayo hakuna mahusiano bora ufanisi nao hushuka hivyo ni wajibu wa kila mmoja  kuhakikisha tunajenga mahusiano bora kwenye utendaji kazi ”Amesisitiza Mhe Jafo.

Amefafanua kuwa haipendezi kuona Mkuu wa Idara anakuwa kama mungu mtu na kuwanyanyasa watumishi walioko chini yake , jambo hili linashusha ari ya watumishi na kupunguza ufanisi katika utendaji kazi wenye mafanikio.

“Ni wajibu wa Mkuu wa Idara au kitengo kuhakikisha anawapa nafasi watumshi anaowaongoza kutoa maoni ya maboresho ili  kuleta mabadiliko kwenye utendaji kazi wa kila siku, jambo hili litasaidia kuongeza kasi ya kujitoa katika kutoa huduma bora kwa wananachi.” Amesema  Mhe. Jafo

Mhe. Jafo amewataka watumishi kujenga mahusiano  baina ya mtu na mtu, idara na Idara ili kuleta mabadiliko ambayo yatasaidia katika kuweka mikakati imara ya kutoa huduma bora kwa wananchi.

Ameendelea kufafanua kuwa kazi hawezi kufanyika vizuri kama hakutakuwa na  upendo na kuheshimiana miongoni mwa watumishi, hivyo amewataka watumishi wa Mamlaka za Serikali za Mitaa nchini kuhakikisha wanaimarisha upendo na amani miongoni mwao.

“Tatizo la Viongozi wanaopewa dhamana hupandisha mabega na kujikweza pale wanapopewa dhamana   na kuwaona watumishi wengine hawana maana, hiki kitu sikubaliani nacho kabisa, kwenye uongozi  lazima  usimamie haki  na wajibu  lakini ruhusu mawazo  ya wengine kutoka kwa watumishi walio chini yako ili kuongeza ufanisi katika utendaji kazi “ amesema Mhe. Jafo

Amewaagiza baadhi ya viongozi waliopewa dhamana  kuacha tabia ya kuwagawa watumishi na kutengeneza majungu kwa wengine ili waonekane  wazuri na kufanikisha mambo yao, bali wasimamie haki kwa watumishi wote ili kujenga umoja na mshikamano.  

Amewataka watumishi wa Mamlaka za Serikali za Mitaa nchini kuhakikisha wanaheshimiana  ili  kuweka mazingira mazuri katika maeneo ya kufanyia kazi

Aidha amewashukuru watumishi wa Ofisi ya Rais TAMISEMI kwa kuonyesha weledi mkubwa katika kutimiza majukumu yao katika kipindi cha miaka minne na kuleta mabadiliko makubwa katika utendaji katika  kuwahudumia wananchi.

Na. Angela Msimbira MOROGORO