Jafo ambana Mkandarasi SKOIL Building Contractors Limited

Imewekwa tar.: December 4th, 2019

Waziri wa Nchi Ofisi ya Rais Tawala za Mikoa na Serikali za Mitaa Mhe. Selemeni Jafo (Mb) ameonyesha kukerwa  na kasi ndogo ya  ujenzi wa barabara kutoka Martin- luther  hadi Swaswa  unaofanywa na  Mkandarasi SIKOL building Contractors Company katika Halmashauri ya Jiji la Dodoma.

Ameyasema hayo leo alipokuwa kwenye ziara ya kikazi kukagua maendeleo ya miradi mbalimbali inayotekelezwa katika Halmashauri ya Jijini Dodoma.

Mhe. Jafo  amesema Mkandarasi huyo hana uwezo wa  kujenga  kutokana na kusuasua kwa ujenzi wa barabara hiyo ambapo alianza  tangu  February, 2019 nakutakiwa kukamilika August, 2019 lakini mpaka sasa bado kazi hiyo haijakamilika licha ya kuongezewa mwezi mmoja kukamilisha hadi kufikia Desemba 30,  2019.

“Dodoma tumejenga barabara nyingi lakini hakuna ubabaishaji kama ujenzi wa Barabara ya Martin- luther hadi Swaswa, hivyo Mkandarasi huyu   uwezo wake ni mdogo na hivyo hataweza kukamilisha ujenzi huo kwa wakati,” amesisitiza Mhe. Jafo

Ameuagiza uongozi wa  Mkoa wa Dodoma kuhakikisha hawatoi  zabuni kwa Mkandarasi  SIKOL building Contractors Company  kwa kuwa ameonyesha kiwango kidogo cha utekelezaji wa miradi aliyopewaya  ya ujenzi wa barabara ya Martin Luther  hadi Swaswa .

“Niwaagize uongozi wa Mkoa wa Dodoma kuhakikisha kapuni hii haipewi tena zabuni katika Mkoa wa Dodoma kutokana na kiwango kidogo walichokionyesha katika ujenzi wa Barabara hiyo, “amesisitiza Mhe Jafo

Amesema kuwa haiwezekani Serikali ikatoa fedha kwa ajili ya ujenzi wa barabara lakini baadhi ya wakandarasi wanakwamisha kwa kutomaliza kwa wakati hili jambo linarudisha nyuma maendeleo ya nchi na kukwamisha juhudi za Serikali za kuleta maendeleo kwa jamii.

Mhe. Jafo amewaagiza wakandarasi wote nchini wanaotekeleza ujenzi wa miradi mbalimbali inayotekelezwa na Mamlaka za Serikali za Mitaa kuacha ubabaishaji, bali wakamilishe miradi kwa wakati walipangiwa ili kuleta maendeleo kwa jamii

“Wakandarasi wanaojenga miradi mbalimbali katika Mamlaka ya Serikali za Mitaa zingatieni muda uliowekwa katika kukamilisha miradi ili kuweza kuhakikisha lengo la Serikali la kutoa huduma kwa jamii linafanyika kwa wakati,” amesema Mhe. Jafo

Naye Mkuu wa Mkoa wa Dodoma Mhe. Dr Binilith Mahenge ameitaka  bodi ya Usajili ya  Wahandisi Nchini kuhakikisha wanafanya uchambuzi  wa kina  kwa wakandarasi wenye makampuni makubwa ili kujua uwezo wao wa kufanyakazi zinazotolewa na Serikali.

Hatahivyo, Meneja wa Tarura Jiji la Dodoma Mhandisi Geofrey Mkinga amesema ujenzi wa barabara hiyo unagharimu shilingi  Bilioni 1.37 na tayari mkandarasi amekamilisha kazi kwa silimia 83  na amekatwa shilingi milioni 82 kwa ajili ya kuchelewesha kukamilisha mradi kwa wakati.

Aidha, katika ziara hiyo Mhe Jafo ametembelea mradi wa ujenzi wa barabara ya Martin-Luther hadi Swaswa, Ujenzi wa eneo la kuegesha magari makubwa (Lorry Park), Ujenzi wa Madarasa na Baabara katika shule ya Sekondari ya Itega na Lukundo.

Na. Angela Msimbira OR-TAMISEMI