DMDP Waipongeza Serikali, Usimamizi mzuri wa Miradi

Imewekwa tar.: May 22nd, 2019

Mtaalam wa Mipangomiji na msimamizi wa mradi wa DMDP Erick Dickson, amepongeza mwenendo wa utekelezaji wa mradi wa uendelezaji Jiji la Dar es Salaam (DMDP) unaosimamiwa na Ofisi ya Rais Tawala za Mikoa na Serikali za Mitaa(OR-TAMISEMI).

Erick ametoa pongezi hizo tarehe 20 Mei, 2019 mara baada yakurejea nchini, wakati wa mkutano mkuu wa tathimini ya mwaka ya Miradi ya  DMDP,  Mradi wa Uimarishaji Halmashauri za Miji (ULGSP) na Mradi wa Uimarishaji Halmashauri za Miji ya Kimkakati (TSCP) unaofanyika kwa siku tano Jijini Dar es Salaam .

“Mtazamo wangu na wa timu ya Benki ya Dunia ni kuwa DMDP ipo kwenye mwelekeo sahihi na kazi nyingi zinaendelea kutekelezwa vizuri. Pongezi nyingi ziende kwa timu nzima inayosimamia mradi wa DMDP na wote wanaofanya kazi bila kuchoka kuhakikisha kuwa DMDP inaleta mafanikio na mabadiliko makubwa. Huu Ndiyo ujumbe tutakao anza nao katika mkutano huu,” alisema Erick.

Ndugu Erick alieleza kuwa, mradi unatekelezwa katika mazingira ambayo kazi nyingi zinafanyika kwa pamoja ikiwepo, Kupandisha hadhi makazi yaliyopangwa kiholela, ujenzi wa barabara zinazounganisha barabara za mwendokasi na barabara kuu (feeder roads), barabara za Mitaa pamoja na mifereji ya maji ya mvua, masoko, vituo vya daladala na nyinginezo.

“ Pamoja na hayo yote taarifa ninazopata ni kwamba tuna mradi ambao tunafanya vizuri na kuleta mabadilliko makubwa pamoja na kuwepo kwa changamoto za kawaida hili ni  jambo la kujivunia,” alisisitiza.

Naye Mratibu wa Kikundi kazi cha utekelezaji wa miradi inayofadhiliwa na Benki ya Dunia (WBWG) Mhandisi, Davis Shemangale alisema kwamba, mradi wa DMDP unatekelezwa ukienda sambamba na Mpango Makakati wa Taifa wa Kukuza Uchumi na Kupunguza Umaskini ifikapo 2025.

“kwa kuzingatia kuwa Dar es Salaam inachangia sehemu kubwa ya pato la Taifa, DMDP hadi sasa imewezesha kwa kiasi kikubwa kurahisisha shughuli za usafiri na usafirishaji na kuongeza mawasiliano na muunganiko wa bararabara kwa maeneo ambayo yalikuwa ni vigumu kufikika hapo awali, hali hiyo imeongeza uimarikaji wa shughuli za kiuchumi” alisema Shemangale.

Mhandisi Shemangale alisema, madhumuni ya Mkutano huo ni kufanya mapitio na kutoa tathmini ya mradi ulipofikia katika utekelezaji wa ujenzi wa miundombinu, maswala ya matumizi ya fedha na utekelezaji wa maswala ya kimazingira na usalama kama yanatimiza vigezo vya kimataifa vilivyoainishwa. Shemanagale  alieleza kuwa, mradi wa DMDP hadi kufikia takribani ni nusu ya utekelezaji wake tayari umekukumbana na changamoto mbalimbali, ukiwapo msongamano mkubwa uliopo katika Jiji ambapo ni takribani ni asilimia 80 ya makaazi yamejengwa kiholela.

“Jiji ni kubwa na linamsongamano Mkubwa na changamoto mojawapo ni upatikanaji wa malighafi za ujenzi katika naeneo ya mbali na mji. Pia ulipaji fidia umekuwa na changamoto mbalimbali zilizosababisha utekelezaji wa mradi kuchelewa katika baadhi ya maeneo,” alisema Mhandisi Shemangale.

Katika hatua nyingine aliishukuru Benki ya Dunia na hasa kiongozi wa timu ya Mradi Erick Dickson kwa kushirikiana kikamilifu na Serikali na kufanya kazi bila kuchoka, ili kuhakikisha changamoto zote za mradi zinashughulikiwa ili kuhakikisha mradi unatekelezwa na kukamilika katika ubora uliokusudiwa.

Mradi wa DMDP unatekelezwa katika Halmashauri ya Jiji la Dar es Salaam kwa gharama ya shilingi bilioni 660, ambazo ni mkopo nafuu kutoka Benki ya Dunia, huku serikali ikichangia shilingi bilioni 25 kama sehemu ya mchango wa serikali.

Anaandika Rapahael Kilapilo- TAMISEMI-DSM.