Dkt. Mpango aagiza kuongezwa watumishi kukabiliana na upungufu Wilayani Uyui 

Imewekwa tar.: October 9th, 2024

Na Fred Kibano, Tabora

Makamu wa Rais wa Jamhuri ya Muungano wa Tanzania Mheshimiwa Dkt. Philip Isidor Mpango ameiagiza Ofisi ya Rais TAMISEMI kuongeza idadi ya watumishi katika Halmashauri ya Wilaya ya Uyui mkoni Tabora ili kukabiliana na upungufu uliopo.

Dkt. Mpango alitoa kauli hiyo ya Serikali tarehe 9 Oktoba, 2024 wakati akiongea na wananchi kwenye uwanja wa Chipukizi uliopo Manispaa ya Tabora wakati wa ziara yake anayoendelea nayo mkoani humo kwa kuiagiza Ofisi ya Rais TAMISEMI kuongeza idadi ya watumishi hususani walimu pamoja na nyumba zao za kuishi.

“nimetoa maelekezo kwa Ofisi ya Rais TAMISEMI, katika mgao ujao wa watumishi watoe upendeleo kwa Wilaya ya Uyui lakini watazame mkoa wa Tabora kwa jicho la pekee, sambamba na hilo, nimewataka waone namna ya kuongeza nyumba za watumishi wa mkoa wetu” alisema Dkt. Mpango.

Aidha, Dkt. Mpango amewasihi wazazi mkoani Tabora kuwapeleka Watoto wao shule lakini kuhakikisha wanakagua maudhui wanayofundishwa kwani kuna baadhi ya shule hususani binafsi zinafundisha mambo yasiyofaa kama ushoga lakini pia kuzuia mimba za utotoni ambapo ameisihi jamii kuacha watoto wasome waweze kufikia ndoto zao.

Katika hatua nyingine, Dkt. Mpango amewataka wazazi na jamii mkoani Tabora kuwapa watoto wao lishe bora ili kupunguza udumavu uliokithiri kwani kwa mujibu wa takwimu za mwaka 2022 kiwango cha udumavu ni asilimia 33.1 huku watoto waliozaliwa wakiwa na uzito pungufu ukiwa ni asilimia 12.2 hali inayotokana na akina mama wajawazito kutokupata lishe bora.

Naye Mkuu wa Mkoa wa Tabora Mheshimiwa Paul Matiko Chacha alimshukuru Mheshimiwa Rais Dkt. Samia Suluhu Hassan kwa kuwapatia zaidi ya shilingi Trilioni moja ambazo zimepelekwa kufanya kazi za maendeleo mkoani Tabora lakini pia alisema hali ya ulinzi na usalama imeimarika na wahalifu mbalimbali wamekamatwa yakiwemo magenge ya utekaji, majambazi na watu wanaoua vikongwe.

Katika uwanja wa Chipukizi maadhimisho ya juma la Elimu ya Watu Wazima ambayo yameandaliwa na Ofisi ya Rais TAMISEMI na Wizara ya Elimu, Sayansi na Teknolojia ikihusisha baadhi ya Taasisi za Wizara hizo yanayofanyika Kitaifa mkoani Tabora yaliyoanza tarehe 7 Oktoba, 2024 na yatafikia kilele tarehe 11 Oktoba, 2024. Kauli Mbiu ya mwaka huu 2024 ni “Ujumuishi katika Elimu bila ukomo kwa ujuzi, ustahimilivu, amani na maendeleo”