DKT. KAPOLOGWE AHIMIZA UWAZI NA UWAJIBIKAJI UJENZI WA VITUO VYA KUTOLEA HUDUMA ZA AFYA

Imewekwa tar.: August 13th, 2023

OR- TAMISEMI

Mkurugenzi wa Idara ya  Afya,  Ustawi wa Jamii na Lishe Ofisi ya Rais- TAMISEMI, Dkt. Ntuli Kapologwe amesisitiza kuwepo kwa uwazi na uwajibikaji katika ujenzi wa vituo vya kutolea huduma za afya unaoendelea kwa kasi nchi nzima.

Ametoa msisitizo huo leo wakati akikagua ujenzi wa miundombinu katika kituo  cha afya cha Sima wilayani Sengerema,mkoani Mwanza.

" Serikali ya Awamu ya Sita inayoongozwa Rais Mhe. Dkt.Samia Suluhu Hassan imetoa zaidi ya shilingi  bilioni 900 ili kujenga na kuboresha Hospitali,zahanati na vituo vya afya nchi nzima ,  kikiwemo kituo cha afya cha  Sima.

"Tunataka kuona thamani ya fedha katika ujenzi huu kwani Serikali imeshaleta milioni 250, hivyo ujenzi ulipaswa kuwa umekamilika tangu mwezi  disemba mwaka jana'', Dkt. Kapologwe amesisitiza.

Naye, mbunge wa jimbo la Sengerema Mhe. Hamis Tabasamu ameishukuru  Serikali ya  Awamu ya Sita  kwa jitihada za kuboresha huduma za afya wilayani Sengerema na kuomba kuongezewa vifaa tiba ili kuendelea kuboresha zaidi utoaji wa huduma.