Mgogoro Wilaya ya Chemba Watatuliwa

Imewekwa tar.: May 7th, 2021

Na Nteghenjwa Hosseah- TAMISEMI

WAZIRI wa Nchi Ofisi ya Rais Tawala za Mikoa na Serikali za Mitaa (TAMISEMI) Mhe. Ummy Mwalimu, ametatua mgogoro wa kiutalawa uliodumu kwa muda mrefu ambao ulisababisha kuzorota kwa utekelezaji wa shughuli za maendeleo katika Wilaya ya Chemba mkoani Dodoma.

Waziri Ummy amezitaka pande mbili hasimu, watendaji na madiwani, kumaliza tofauti zao na badala yake kuwa kitu kimoja, kufanya kazi kwa mshikamano, kuheshimiana na kupendana.

Kikao hicho kilichofanyika mapema hii leo chini ya Waziri Ummy, alibaini chanzo cha mgogoro ni mgawanyiko mkubwa kati ya waheshimiwa madiwani, Menejiment ya Halmashauri pamoja na Menejimenti kutokuwa na mshikamano katika utendaji wa kazi.

Sababu nyingine ni ushirikishwaji mdogo wa madiwani kwenye baadhi ya maamuzi ya Halmashauri pamoja na kutokulipwa stahiki zao kwa kipindi kirefu sasa, kitu ambacho kimechochea kuzalisha madeni yanayo athiri Halmashauri kwenye utendajikazi.

Aidha, ukusanyaji mapato usioridhisha wa makusanyo ya ndani na matumizi yasiyo sahihi ya mashine za kukusanyia mapato (POS) pamoja na kuchelewa kupeleka makusanyo Benki na matumizi ya fedha kabla yakufikishwa benki kwanza (Fedha mbichi).

Mhe. Ummy amebaini, upelekaji mdogo wa fedha kwenye miradi ya maendeleo pamoja na kutotumika vema kwa fedha za maendeleo   katika shughuli za maendeleo na badala yake fedha zimekuwa zikitumika   kwa ajili ya posho za safari, vikao na semina.

Baada ya majadiliano ya muda takribani ni saa mbili, Mhe. Ummy, alitumia fursa hiyo kutoa maelekezo kwa halmashauri zote nchini kuhakikisha, wataalam na madiwani wanafanya kazi kwa ushirikiano bila kuhasimiana miongoni mwao, kwani migogoro haijengi bali inabomoa.

Pia amezitaka Halmashauri kuongeza usimamizi katika ukusanyaji wa mapato ya ndani ya Halmashauri na kuhakikisha asilimia 40 ya fedha zinazokusanywa zinapelekwa kwenye miradi ya maendeleo ambayo inawagusa wananchi moja kwa moja kama vile shule, hospitali na masoko.

“Nazikumbushe tena halmashauri zote nchini  kuwa, fedha za maendeleo nataka ziende kwenye maendeleo, miradi ile ambayo inatatua changamoto za wananchi moja kwa moja kama madarasa, madawati, matundu ya vyoo, zahanati, vituo vya afya, sio kulipana posho za safari, vikao au semina wakati miradi ya wananchi mmeiacha imelala” alisema Ummy.

Aliwataka watendaji wote waliopewa dhamana ya kukusanya mapato ya ndani ya halmashauri kutekeleza wajibu wao kwa kuzingatia sheria, uaminifu na uadilifu wanapo tekeleza jukumu hilo, huku akionya kwamba wale wote watakaokwenda kinyume wata ondolewa katika nafasi hizo.

Katika hatua nyingine Waziri Ummy, amesisitiza kuongeza udhibiti wa mifumo ya kukusanyia mapato katika halmashauri (Internal Control) na kuhakikisha watumishi wote wanaokabidhiwa mashine za kukusanyia mapato  wanazihifadhi vizuri bila kutoa namba za siri na jina la mtumiaji.

Amewahimiza watumishi wote wanaokusanya mapato kuhakikisha wanawasilisha fedha za makusanyo benki ndani ya saa 24 baada ya kufanya usuluhisho na kutoa ankra ya malipo kutoka kwa mhasibu wa halmashauri.