Asilimia 47 ya Watoto wapo kwenye ukuaji timilifu - Mpanju

Imewekwa tar.: March 18th, 2024

Naibu Katibu Mkuu Wizara ya Maendeleo ya Jamii, Jinsia, Wanawake na Makundi Maalum Mhe. Amon Mpanju kwa niaba ya Naibu Katibu Mkuu Ofisi ya Rais - TAMISEMI (AFYA) Dkt.Charles Mahera amesema matokeo yameonesha kuwa ni asilimia 47 tu ya watoto wenye umri wa miezi 24 – 59 wapo kwenye mwelekeo sahihi wa kufikia ukuaji timilifu kiafya, katika kujifunza na ustawi wa kisaikolojia na kijamii.

Kati ya hao asilimia ya watoto walio katika mwelekeo sahihi wa kufikia ukuaji timilifu inapungua kadri umri unavyoongezeka kutoka asilimia 36 kwa watoto wa miezi 24 -35 mpaka asilimia 58 kwa watoto wenye umri wa miezi 48 -59.

Mhe. Mpanju ameyasema hayo wakati akifungua kikao kazi cha uwasilishaji wa viashiria vya malezi, makuzi na maendeleo ya awali ya mtoto kwa mwaka 2030 kwa wataalam ngazi ya Mikoa kilichowajumuisha wataalamu kutoka Wizara za Kisekta, Makatibu Tawala wasaidizi Elimu na Afya,  Maafisa Ustawi wa Jamii, Lishe na Maendeleo ya Jamii pamoja na Shirika la Umoja wa Mataifa linaloshughulikia masuala ya watoto (UNICEF)  kilichofanyika Machi 18, 2024 Jijini Dodoma katika ukumbi wa Lavenda.

“Matokeo ya utafiti huu yatajenga hamasa kwenye Mikoa yenu kutenga bajeti ya masuala ya Malezi Makuzi na Maendeleo ya Awali ya Mtoto ili kuhakikisha kuwa watoto wote wanapata huduma stahiki wakue  na kufikia utimilifu wao” alisema Mhe.Mpanju

Pia Mhe. Mpanju amesema mnapaswa kufanya kazi kwa ushikiano mkizingatia taaluma zenu ili kila mmoja kwa nafasi yake aweze kupimwa kulingana na taaluma na nafasi yake katika kutekeleza masuala ya malezi, makuzi na Maendeleo ya Awali ya Mtoto.

Aidha Mhe. Mpanju amekumbusha kuwa taarifa za utekelezaji wa programu ziwasilishwe kwa wakati Ofisi ya Rais- TAMISEMI ili ziweze kuwafikia viongozi kwenye Wizara za Kisekta na wadau mbalimbali kwa hatua zaidi za utekelezaji. 

Pia amewataka kuhakikisha programu hii inaeleweka na kutekelezwa katika ngazi zote ikiwemo Mkoa, Halmashauri na ngazi ya  Jamii .

"bajeti itengwe ili kuchochea utekelezaji wa programu hii kwenye ngazi ya Mikoa na Halmashauri zetu" amesisitiza Mpanju.

Pia amewataka Kushirikiana na Wadau wa Malezi waliopo katika Mikoa yao katika utekelezaji wa huduma za  Malezi, Makuzi na Maendeleo ya Awali ya Mtoto.