WAZIRI MKUU AZINDUA VITABU VYA KIMKAKATI ELIMU MSINGI NA SEKONDARI

Imewekwa tar.: August 4th, 2022

OR-TAMISEMI

Pamoja na Ufunguzi wa Mashindano ya UMITASHUMNTA na UMISSETA, Waziri Mkuu wa Jamhuri ya Muungano wa Tanzania Mhe. Kassim Majaliwa amezindua  vitabu vitatu  vya  kimkakati vya kutoa  miongozo  na mikakati ya kuboresha  Elimu Msingi na Sekondari nchini  pamoja na kuimarisha uongozi  katika Ngazi za Shule, Kata, Halmashauri  pamoja na Mikoa.

Vitabu hivyo vimezinduliwa rasmi katika Ufunguzi wa mashindano ya michezo katika  Shule za Msingi (UMITASHUMNTA) pamoja mashindano ya michezo katika shule za  Sekondari (UMISSETA) tarehe 04 Agosti 2022 Mkoani Tabora.

Akisoma taarifa yake Naibu Waziri Nchi,  Ofisi ya Rais Tawala za Mikoa na Serikali za Mitaa Mhe. David Silinde amesema kuwa Ofisi ya Rais-TAMISEMI iliunda kikosi kazi kilichobainisha changamoto zote za uendeshaji wa   Elimu ya Msingi na Sekondari  pamoja na kutoa  muongozo wa nini kifanyike ili kuboresha elimu nchini.

“Kipitia  uchambuzi huo uliofanywa na kikosi kazi hiko Ofisi ya  Rais-TAMISEMI  imeandaa vitabu vitatu  vitakaotoa miongozo  na mikakati ya kuboresha  Elimu Msingi na Sekondari nchini  pamoja na kuimarisha uongozi  katika ngazi za Shule, Kata  , Halmashauri na Mikoa  nchini” Mhe. Silinde

Akivitaja vitabu hivyo Mhe. Silinde amesema kitabu cha kwanza kinaitwa   muongozo wa uteuzi wa viongozi  wa elimu katika Mamlaka  za Serikali za Mitaa  na Mikoa ,

amebainisha kuwa  kitabu  hicho  kimeanisha taratibu  zinazopaswa kuzingatiwa  katika kuteua viongozi  wa elimu ndani ya  Mamlaka za Serikali za Mitaa na Mikoa ili   kuwawezesha  waliopewa dhamana ya uteuzi  kurejea taratibu za kufuata wakati wa uteuzi wa viongozi  wa elimu.

“Kitabu cha pili kinaitwa Changamoto  katika uboreshaji wa Elimu Msingi  na Sekondari na nini kifanyike,  kitabu hiki kimebainisha changamoto kuu za utekelezaji wa  maboresho ya ufundishaji  na ujifunzaji pamoja na  hatua  vinavopaswa kuchukuliwa na viongozi wa elimu   kutoka ngazi zote  kuanzia ngazi ya shule hadi Taifa” Mhe. Silinde

Cha tatu ni   kitabu cha kuimarisha ufundishaji  na ujifunzaji katika   ngazi ya  elimu msingi,  amesema kuwa   kitabu hiki kimelenga kuwawezesha wataalam na walimu kubaini changamoto za kina za ufundishaji na ujifunzaji  zilizopo,   athari za changamoto hizo,  fursa zilizopo pamoja  na kutumia mikakati ya utatuzi wa  changamoto hizo.

“Vitabu hivi vya kimkakati  vimelenga kila msimamizi wa elimu Msingi  na Sekondari  kuhakikisha  anazidisha ubunifu  na uweledi katika ufundishaji mwenye kuleta tija  inayotarajiwa  kwa mwanafunzi mmoja mmoja  kwa kutumia mbinu mbalimbali  zikiwemo michezo  na Sanaa za Maonesho” Mhe. Silinde