WAZIRI KAIRUKI AMEWATAHADHARISHA WATUMISHI WA UMMA WANAOKIUKA TARATIBU NA KANUNI ZA KIUTUMISHI

Imewekwa tar.: January 10th, 2023

OR-TAMISEMI

Waziri wa nchi ofisi ya Rais Tawala za mikoa na Serikali za mitaa Mhe. Angellah Kairuki  amewatahadharisha watumishi wa umma wanaokiuka taratibu na kanuni za kiutumishi kwa kutoa lugha chafu kwa wananchi huku akiahidi kuwashughulikia.

Waziri Kairuki ametoa kauli hiyo Mkoani Morogoro akizungumza na walimu  katika  kikao kazi  cha uboreshaji wa usimamizi wa elimumsingi na sekondari, kilichowakutanisha maafisa elimu Wilaya, Kata, wakuu wa shule za  sekondari, na walimu wakuu wa shule za msingi mkoani humo.

Alisema wapo watumishi wanaotoa lugha chafu na zinarekodiwa na kusambazwa kwenye mitandao ya kijamii, hiyo sio sawa, na Serikali yawamu ya sita inayoongozwa na Rais Dk. Samia Suluhu Hassan hawezi kumvumilia mtumishi asiye na nidhamu mahala pakazi.

“Ili kudhibiti hali hii tumeweka mitego kila sehemu zinapotolewa huduma za kijamii ili kuwabaini wenye tabia za kutoa lugha chafu na sambamba mitandaoni ili tuwachukulia hatua.” alisema Waziri Kairuki.

“Watu tunaowaweka ni maalumu sio wananchi hivyo watawatega kwa maswali ili mjibu lugha chafu tuwabaini, lile lililotokea kwa watumishi wa afya hivi karibuni Tabora sio wale tu wapo wengi”aliongeza

Akizungumzia kuhusu masuala ya rushwa kazini Waziri Kairuki alisema wapo baadhi ya watumishi wanaotoa rushwa ili kupata madaraka jambo ambalo ni kinyume na taratibu za kiutumishi.

Alisema hategemei kama mkuu wa shule ameingia kwa kutoa rushwa atafanya kazi kwa uadilifu, maana lazima atafanya kila njia ili aweze kurejesha kike alichotoa.

” Kama mambo haya yapo yakome mara moja, Serikali ipo makini, hatutawafumbia macho wote watakaobainika watachukuliwa hatua”alisema.

Akitoa salamu za Mkoa Mkuu wa Mkoa wa Morogoro Bi. Fatma Mwasa alisema Septemba, 2022, Mkoa huo ulipokea Fedha kutoka Serikali Kuu kiasi cha shilingi bilioni sita na milioni mia tisa (6,900,000,000.00) kwa ajili ya ujenzi wa vyumba vya madarasa 345 ili kuwapokea Wanafunzi wa Kidato cha Kwanza 2023 ambapo madrasa 336 yamekamilika na 3 yapo katika hatua za mwisho.