Wataalam wa Maabara na Wafamasia waaswa kusimamia vifaa tiba

Imewekwa tar.: June 29th, 2022

Na Fred Kibano

Serikali imewataka Waratibu wa Maabara na Wafamasia ngazi ya Mikoa kusimamia vifaa tiba ili kuwezesha utoaji wa huduma bora za afya kwa wananchi.

Akifungua kikao kazi cha Waratibu wa Maabara na Wafamasia wa Mikoa kwa niaba ya Naibu Katibu Mkuu (AFYA) Ofisi ya Rais TAMISEMI Dkt. Grace Maghembe katika ukumbi wa Jakaya Kikwete Conventional Centre Jijini Dodoma, Dkt. Paul Chamote amesema kuwa Serikali imewekeza fedha nyingi kwa ajili ya kutoa huduma za afya nchini na hivyo wataalam hao hawana budi kuvitunza.

“nitumie fursa hii kuwaelekeza kusimamia vifaa hivyo ipasavyo na kuhakikisha kuwa vinatoa huduma iliyokusudiwa, nia ya Serikali ni kuhakikisha kuwa mwananchi anapata huduma ya afya iliyo bora na karibu ya maeneo wanayoishi”

Amesema katika mwaka wa fedha 2021/2022 Serikali imeidhinisha jumla ya shilingi bilioni 11.3 kwa ajili ya ununuzi wa vifaa na vifaa tiba kwa hospitali 331 za awamu ya pili zilizoanza kujengwa katika mwaka 2018/2019 ambapo mwaka 2021 Ofisi ya Rais TAMISEMI ilipeleka kiasi cha shilingi bilioni 98 kwa Wakala wa Dawa (MSD) kwa ajili ya ununuzi na usambazaji wa vifaa vya CEmONC katika vituo vilivyoboreshwa.

Aidha, amewataka Wataalam hao kutunza zana za usimamizi na ufuatiliaji wa vifaa tiba vyenye thamani ya shilingi bilioni 94.4 ambavyo vitatoa huduma kwenye majengo ya dharura (EMD) na wagonjwa mahututi (ICU) yaliyojengwa hivi karibuni ikiwa ni pamoja na kuhakikisha ukaguzi wa bidhaa za afya unafanyika kila robo ya mwaka na kutumwa Ofisi ya Rais TAMISEMI ikionesha hatua zilizochukuliwa kwa yote yaliyobainishwa”

Kwa upande wake Elizabeth Shekalaghe Msajili wa Maduka ya Dawa (Pharmacy) nchini amewataka Waratibu hao wa Mikoa kuitumia taaluma yao ya maabara ipasavyo kwa kuwa ndio wanaotegemea kutoa ushauri thabiti kwenye eneo la taaluma hiyo lakini pia kuendelea kusimamia maduka ya dawa na maabara kwa weledi wa taaluma yao.  

Naye Julius Mwasimba Msimamizi wa Huduma za Maabara Mkoa wa Lindi amesema kikao kazi hicho kitawasaidia wataalam kujadili changamoto ili kupata matokeo chanya kwenye kazi yao na pia ameipongeza Serikali kwa kuendelea kuwapatia huduma stahiki za afya.

Serikali katika mwaka wa fedha 2021/2022 iliajiri watumishi wapatao 7,612 wa kada ya afya ikiwa ni pamoja na watumishi wa radiolojia ambao watasaidia utoaji wa huduma bora za afya.