Wataalam kada ya Afya Watakiwa kuzingatia sheria na Uwajibikaji

Imewekwa tar.: May 28th, 2018

Naibu Katibu Mkuu (Afya), Ofisi ya Rais Tawala za Mikoa na Serikali za Mitaa (OR TAMISEMI), Dkt. Zainab Chaula amewaasa Wataalam wa Afya katika Mikoa na Halmashauri kufanya kazi kwa kuzingatia kanuni, sheria, miongozo.

Dkt. Chaula ameyasema hayo wakati wa kuhitimisha mafunzo ya Wataalam hao wa kada ya afya nchini yaliyofanyika kuanzia 21 hadi tarehe 28 Mei katika ukumbi wa Chuo Kikuu cha Mipango Jijini Dodoma.

Amesema wananchi wanahitaji huduma iliyo bora kama inavyoelezwa katika Ilani ya Chama Tawala ambayo wataalam ni watekelezaji wa Ilani hiyo.

“Ukiona wananchi wanasikitika ujue, unalofanya sio jema hivyo ni lazima kila mtu ajitathmini, atimize wajibu wake na sio kufanya kazi kwa mazoea .

Dkt. Chaula amesisitiza matumizi sahihi ya fedha za Umma zinazotolewa kwa ajili ya huduma za afya zitumike kwa wakati na kuacha huku akionya kutokuwa na  akaunti nyingi ambazo hazitakiwi  kisheria na hazina tija.

Dkt. Zainab Chaula alikifafanua takwimu za kiutekelezaji za Mamlaka za Serikali za Mitaa kabla ya kuhitimisha kikao kazi cha Wataalam wa afya katika Mikoa na Mamlaka za Serikali za Mitaa baadhi ya wataalam wa afya waliohudhuria kikao kazi kutoka mikoa ya Lindi, Mtwara, Dodoma, Manyara na Kilimanjaro.

Sambamba na hilo  Dkt. Chaula amesema Ofisi ya Rais TAMISEMI, itaendelea kusimamia na kutoa tafsiri sahihi ya sera, kanuni na miongozo mbalimbali, hivyo tafsiri hizo sasa zinatakiwa ziwekwe katika vitendo na kuleta matokeo chanya.

Ofisi ya Rais TAMISEMI imelenga kuboresha huduma za afya, kwa kuongeza tija katika utendaji wa kuwahudumia wananchi ili kufikia malengo ya Serikali ya awamu ya tano.

Mafunzo kwa ajili ya wataalam wa afya yaliyofanyika kwa siku saba yaliandaliwa na Ofisi ya Rais TAMISEMI na kushirikisha mikoa yote nchini.  

Anaandika Fred Kibano OR TAMISEMI