Wasimamizi wa Uchaguzi Ngazi ya Wilaya Waapishwa

Imewekwa tar.: September 12th, 2019

Serikali imewataka Wasimamizi wa Uchaguzi wa Serikali za Mitaa mwaka 2019 kusoma kwa makini na kusimamia sheria, Miongozo na Kanuni za uchaguzi wa Serikali za Mitaa ili kuondoa kasoro zinazoweza kujitokeza wakati wa uchaguzi.

Kauli hiyo imetolewa leo Jijini Arusha na Katibu Mkuu Ofisi ya Rais TAMISEMI Mhandisi Joseph Nyamhanga wakati akishuhudia kuapishwa kwa Wasimamizi wa Uchaguzi wa Serikali za Mitaa wa Halmashauri 6 za mkoa wa Arusha wanaotarajiwa kutoa tangazo la uchaguzi na kutaja maeneo ya utawala hapo kesho.

Mhandisi Nyamhanga amesema kuna haja kubwa ya kujua Kanuni za uchaguzi na Miongozo yake ili kuufanya uchaguzi kutokuwa na kasoro kwa kuzingatia sheria za uchaguzi wa Serikali za Mitaa.

Mhandisi Nyamhanga amesema Waziri Mwenye dhamana na Serikali za Mitaa alifanya uteuzi wa Wasimamizi wa uchaguzi wa Serikali za Mitaa ngazi ya Wilaya wapatao 184 ambao wote wameapishwa leo nchini kote ili kuendelea na majukumu yote ya uchaguzi utakaofanyika Novemba 24, 2019.

Kwa upande wake Katibu Tawala wa Mkoa wa Arusha Bw. Richard Kwitega amesema maandalizi yote ya uchaguzi wa Serikali za Mitaa mkoani Arusha yapo tayari na kwamba wateule wote wa uchaguzi walioapishwa leo wanatakiwa kufanya kazi kwa kuzingatia taratibu zote na kanuni za uchaguzi wa Serikali za Mitaa za mwaka 2019.

Amesema katika Halmashauri saba za mkoa wa Arusha jumla ya Miji midogo 6, Kata 158, Mitaa 154, Vijiji 390 na Vitongoji 1,505 ambavyo kwa pamoja wakazi wake watapiga kura kuwachagua Viongozi wa Serikali za Mitaa katika ngazi mbalimbali kama  sehemu ya maboresho ya demokrasia nchini.

Naye Theresia Kyara ambaye Msimamizi wa uchaguzi wa Serikali za Mitaa katika Halmashauri ya Wilaya ya Monduli amesema anaishukuru Serikali kwa kumteua kuwa msimamizi wa uchaguzi wa Serikali za Mitaa na kwamba ataifanya kazi hiyo kwa kuzingatia Kanuni, Sheria na Miongozo ya uchaguzi wa Serikali za Mitaa.

Wasimamizi wa uchaguzi wa Serikali za Mitaa ngazi ya Wilaya mkoa wa Arusha walioapishwa leo ni Msena Bina wa Arusha Jiji, Pius Haule wa Halmashuri ya Wilaya ya Karatu, Hossein Mgewa wa Halmashauri ya Wilaya ya Arusha, Natang’aduaki Molleli wa Halmashauri ya Wilaya ya Longido, Jonathan Kiama wa Halmashauri ya Wilaya ya Meru, Theresia Kyara wa Halmashauri ya Wilaya ya Monduli na Emmanuel Mhando wa Halmashauri ya Wilaya ya Ngorongoro.

        Anaandika Fred Kibano