Wasaidizi jamii watakiwa kujengewa uwezo

Imewekwa tar.: September 12th, 2022

Mkurugenzi wa Idara ya Usimamizi wa Elimu Ofisi ya Rais- Tawala za Mikoa na Serikali za  Mitaa, Ephraim  Simbeye amewataka washiriki wa mafunzo ya wawezeshaji wa mafunzo ya mpango  wa utayari wa mtoto kuanza shule  kuhakikisha wanawajengea  uwezo wasaidizi Jamii wa Walimu waliopo katika  Halmashauri  zao  ili  kuongeza  umahiri kwa  wanafunzi na kuleta mabadiliko tarajiwa katika ngazi ya  Elimu Msingi.

Amesema kuwa lengo la mafunzo hayo ni kuendelea kuleta mabadiliko katika elimu msingi hivyo kila mshiriki ahakikishe  anashirikisha maarifa  atakayoyapata katika mafunzo hayo  ili kuendelea kuleta maboresho na kuongeza umahiri kwa wanafunzi.

Wito huo umetolewa tarehe 12 Septemba 2022 katika Ufunguzi wa Mafunzo ya waweshaji wa mafunzo ya Mpango wa utayari wa mtoto kuanza shule uliofanyika  Jijini Dodoma.

Aidha amewataka  washiriki wa mafunzo hayo kuendelea kutoa hamasa na  kuzingatia  uandikishaji jumuishi  kwa  watoto ambao wamefikia umri wa kuanza Elimu ya awali  ili kila mtoto aweze kupata fursa  ya kupata Elimu na kuongeza umahiri  pindi atakapoanza  elimu ya Msingi.

“Uandikishaji wa elimu ya awali umeshaanza kuanzia mwezi wa Septemba hadi Disemba, tukaendelee kutoa hamasa na kuzingatia elimu jumuishi  ili kuunga mkono  azma ya Serikali ya kuhakikisha kila mtoto ambae amefikisha umri wa kuanza elimu ya awali anapata elimu” Simbeye

Awali Simbeye amewashukuru wadau wa maendeleo katika Sekta ya Elimu, Shule bora  kwa kushirikiana na Serikali katika kuleta mabadiliko na maboresho katika ngazi ya elimu msingi hususani katika elimu ya awali Msingi na kuhaidi ushirikiano zaidi .

Akisoma  taarifa yake Kaimu Mkurugenzi kutoka Taarifa  ya Elimu Tanzania (TET) Bw. Moses Ziota amesema kuwa  mafunzo haya yametolewa kwa  washiriki 57 kutoka katika  Halmashauri 19 kutoka katika Mikoa ya Rukwa, Pwani na Simiyu yakijumuisha walimu wa Elimu ya Awali,Maafisa Elimu Kata  pamoja na wawakilishi kutoka katika ofisi za Halmashauri.