Wanufaika wa kwanza Elimu Msingi bila Malipo kuanza Mitihani ya Kuhitimu Kidato cha Nne

Imewekwa tar.: November 3rd, 2019

Wanafunzi  wa Awamu ya Kwanza walioanza masomo yao ya Kidato cha Kwanza kupitia mpango wa ElimuMsingi Bila Malipo iliyoanza kutekelezwa na Serikali ya Awamu ya Tano chini ya Uongozi wa Mheshimiwa Dkt. John Pombe Joseph Magufuli, Rais wa Jamhuri ya Muungano wa Tanzania wataanza Mitihani yao ya Kuhitimu Kidato cha Nne mapema Kesho Tarehe 04/11/2019.

Hayo yamebainishwa na Waziri wa Nchi Ofisi ya Rais Tawala za Mikoa na Serikali za Mitaa Mhe Selemani Jafo alipozungumza na Waandishi wa habari Kwenye Ofisi ndogo za Wizara Magogoni Jijini Dar es Salaam Tar. 03/11/2019.

Amesema Mtihani wa kuhitimu Elimu ya Sekondari, Kidato cha Nne mwaka 2019 unatarajiwa kufanyika kote nchini kuanzia tarehe 04 hadi 22 Novemba, 2019. Sambamba na mtihani huo, upimaji wa Kitaifa wa Kidato cha Pili (unatarajiwa kufanyika tarehe 11 hadi 22 Novemba, 2019  na Upimaji wa Kitaifa wa Darasa la Nne utafanyika tarehe 20 na 21 Novemba, 2019 kwa kuzingatia taratibu zilizowekwa na Baraza la Mitihani la Tanzania (NECTA).

“Niwakumbushe Watanzania wenzangu kuwa, Wanafunzi wanaoanza Mitihani yao kesho Jumatatu ya Kuhitimu Kidato cha Nne walianza Kidato cha Kwanza Januari, 2016 mara baada ya Serikali ya Awamu ya Tano kuingia Madarakani. Kwa maana nyingine, hawa ndiyo wanafunzi wa Awamu ya Kwanza walioanza masomo yao ya Kidato cha Kwanza kupitia mpango wa ElimuMsingi Bila Malipo, sisi kama Serikali tunajivunia hilo”» Alisema Jafo

Aliongeza kuwa jumla ya Watahiniwa 485,866 (wavulana 229,838 na wasichana 256,028) wanatarajiwa kufanya Mitihani hiyo ya kuhitimu Kidato cha Nne. Kati ya hao, watahiniwa wa shule ni 433,052 na watahiniwa wa kujitegeme ni 52,814.

“Kwa mwaka huu kuna ongezeko la watanihiwa 5871 sawa na asilimia 1.37 ukilinganisha na wahutimu wa mwaka 2018 ambao walikua 427,181 ilihali mwaka huu 2019 Watahiniwa ni 433,052 “. alisema Jafo.

Alifafanua kuwa Takwimu zinaonesha Idadi ya Wanafunzi wanaohitimu Kidato cha Nne imekuwa ikiongezeka mwaka hadi mwaka na kuanzia 2016 wanafunzi waliofanya Mtihani wa Kidato cha Nne walikuwa 349,524, 2017 wanafunzi 317,777, 2018 wanafunzi 427,181 na mwaka 2019 wanafunzi 433,052.

Kwa sababu hiyo, kuanzia mwaka 2016 hadi mwaka huu, jumla ya wanafunzi 83,528 sawa na asilimia 23.9 wameongezeka alisema.

Jafo aliongeza kuwa  kutokana na takwimu hizi ni dhahiri kuwa mahitaji ya fursa elimu yanaongezeka miongoni mwa jamii yetu na Watanzania waliowengi hasa wa maeneo ya Vijijini sasa wanapeleka watoto wao shule bila kushurutishwa kama ilivyokuwa hapo awali.

“Takwimu hizi pia zinatutaka sote – Serikali, Wananchi na Wadau wengine wa elimu kuungana pamoja kuhakikisha kuwa tunaisaidia Serikali katika kuchangia maendeleo ya Elimu kwa watoto wetu na kwa vizazi vyetu vijavyo “alisema Jafo.

Wakati huo huo Jafo alielezea namna ambavyo Serikali ya Awamu ya Tano imeendelea kuwekeza kwa Kiwango kikubwa katika elimu na kusema kwa mwaka 2019/20, Serikali imetenga bajeti ya shilingi 288,485,000,000.00 kutekeleza Mpango wa Elimu msingi bila malipo kwa wanafunzi wote kuanzia elimu ya Awali hadi Kidato cha Nne.

Pia Serikali itaendelea kutoa fedha ya chakula kwa wanafunzi wa Kidato cha Tano na Sita kwa shule zote za umma alisema.

Aidha, Jafo alitumia fursa hiyo kuwataka Viongozi na Watendaji wote wanaoshiriki katika usimamizi na uendeshaji wa Mitihani hiyo kufanya kazi zao kwa weledi, maadili na kwa kufuata sheria, Kanuni na Taratibu za Usimamizi na Uendeshaji wa Mitihani hiyo kama ilivyoelekezwa na Baraza la Mitihani la Tanzania. Serikali isingependa kusikia changamoto zozote za makusudi zitakazosababishwa na wanaohusika na usimamizi na uendeshaji wa mitihani hiyo.

Ifahamike kuwa tangu Mpango wa ElimuMsingi Bila Malipo uanze Januari, 2016, jumla ya shilingi 937,548,685,734.72 zimetumika kugharamia elimu ya watoto wetu.

Jumla ya wanafunzi takribani milioni kumi na mbili kuanzia Elimu ya Awali hadi Kidato cha Sita wanafaidika na Mpango huo.

Na. Nteghenjwa Hosseah, OR-TAMISEMI