Wanafunzi Waaswa Kushiriki Shindano la Insha Taifa

Imewekwa tar.: June 1st, 2020

Naibu Katibu Mkuu Ofisi ya Rais Tawala za Mikoa na Serikali za Mitaa anayeshughulikia Elimu Gerald Mweli amefungua rasmi shindano la insha Taifa kwa kidato cha kwanza hadi cha nne  Jijini dodoma.

Akifungua shindano hilo la kitaifa kwa niaba ya Waziri wa Nchi Ofisi ya Rais TAMISEMI Mhe. Selemani Jafo, Mweli amewataka wazazi na walezi kusaidia ushiriki wa watoto wao ili kujiongezea stadi za kufikiri, kuandika, kujieleza na kufanya tafiti zitakazowasaidia katika masomo, kuwafanya wasomi mahiri na pia katika maisha yao.

“wote tunafaahamu kwamba insha imekuwa na mchango mkubwa katika kusaidia watoto hasa katika kuinua uwezo wao wa kufikiri, uwezo wa kuandika,uwezo wa kufanya tafiti na uwezo wa kujieleza kwa lugha za kiswahili na kiingereza. Nitoe wito kwa wanafunzi wote kutembelea kwenye tovuti ya www.mybook.co.tz  ili kujisajili, kuchagua mada na kufuata  vigezo vilivyoainishwa “

Aidha, amesema shindano hilo litaanza leo Juni Mosi, 2020 hadi tarehe 30 Juni, 2020 na kwamba kila mshiriki atatakiwa kufuata vigezo vilivyoanishwa kwenye tovuti iliyoelekezwa ambapo siku ya mwisho baada ya kukamilisha zoezi zitatolewa zawadi kwa washindi ikiwa ni pamoja na vyeti vya kutambua ushiriki wao.

Amesema Walimu mahiri watahusishwa katika kusahihisha insha zote kwa wanafunzi wa shule za sekondari kwa kidato cha kwanza mpaka cha nne kwa mwaka 2020 na kuzitolea matokeo kwa washindi wa kwanza hadi wa kumi.

Naye Athumani Mohammed Meneja wa Mahudhui toka Drem Tree Co. Ltd amesema zawadi zitakazotolewa kwa washindi wa kwanza mpaka wa kumi ni pamoja na Mshindi wa kwanza mpaka wa tano watapata kompyuta mpakato kwa kila mmoja na fedha taslimu shilingi 500,000 kwa mshindi wa kwanza, 400,000 mshindi wa pili, 300,000 mshindi wa tatu, 200,000 mshindi wa nne na shilingi 100,000 kwa mshindi wa tano.

Kwa washindi wa sita hadi wa kumi watapata shilingi 100,000 kila mmoja  pamoja na vyeti kwa wanafunzi wote waliofanya vizuri vitakavyotolewa na Ofisi ya Rais TAMISEMI mbali na zawadi hizo kutakuwa na mpango maalum wa kuwafundisha washindi hao matumizi bora ya mtandao  zoezi litakaloendeshwa na Asasi ya Dream Tree. Pia kutakuwa na sherehe maalum ya kuwatambua na kuwakabidhi  zawadi washindi wote.

Shindano la insha linaratibiwa kwa pamoja kati ya Ofisi ya Rais TAMISEMI na  Asasi ya Dream Tree kwa lengo la kuwajenga vijana kuwa wasomi bora na uwezo wa kutumia lugha zote mbili za Kiswahili na kiingereza ambapo linaanza tarehe Mosi June na kukamilka Juni 30, 2020.

Na. Fred Kibano OR TAMISEMI