Wakuu wa Mikoa watakiwa kukamilisha ahadi kupata fedha za GPE

Imewekwa tar.: August 31st, 2023

Na Fred Kibano – Dar es Salaam

Rais Mstaafu wa Awamu ya Nne wa Tanzania Mheshimiwa Dkt. Jakaya Mrisho Kikwete ametoa wito kwa Wakuu wa Mikoa walioahidi kutoa zaidi ya Shilingi Bilioni 465 kama ahadi ambazo zitaisaidia nchi kupata fedha za ruzuku (grant) kiasi cha Dola milioni 50.

Mheshimiwa Jakaya Kikwete ambaye pia ni Mwenyekiti wa Bodi ya Wakurugenzi iliyo chini ya Taasisi ya Ushirikiano wa Elimu Duniani (Global Partnership for Education) ameyasema hayo leo tarehe 31.08.2023 Jijini Dar es Salaam wakati akitoa hotuba yake kama mgeni rasmi katika hafla iliyohudhuriwa na Wakuu wa Mikoa  na Wadau wa Elimu kutoka mikoa yote Tanzania Bara.

“tumeshasikia jinsi ahadi zilivyotolewa, zaidi ya shilingi Bilioni 465, matumaini yangu walioahidi watatoa, ahadi ni deni, Wakuu wa Mikoa mmetoa ahadi wenyewe hapa” amesema Mheshimiwa Jakaya Kikwete.

Aidha, Kikwete amesema miradi ya GPE nchini, ilifadhiliwa kwa awamu mbili za mwaka 2014 hadi 2018 na 2018 hadi 2023 ikihusisha ujenzi wa madarasa mapya ya shule za msingi 2,980, mabweni ya wanafunzi wenye mahitaji maalum 14, matundu ya vyoo 7,673, shule mpya 98, shule mpya 18, nyumba za walimu 94, ukarabati wa vituo vya walimu 13 (TRC), ujenzi na uendeshaji wa vituo vya walimu 12, uendeshaji wa Mafunzo ya Walimu Kazini (MEWAKA) na ununuzi wa vifaa vya Kufundishia na Kujifunzia kwa walimu na wanafunzi.

Kwa upande wake Prof. Adolf Mkenda akimkaribisha mgeni rasmi amesema Mheshimiwa Rais Dkt. Samia Suluhu Hassan amejenga imani kubwa kwa Sekta Binafsi nchini na ndio maana Wadau wameitikia kwa kiwango kikubwa na kuendelea kutoa michango yao kwenye elimu hapa nchini na hivyo ni jambo jema kwa wizara ya Elimu na Ofisi ya Rais TAMISEMI kutambua mchango wa Wadau kwenye Sekta ya Elimu nchini.

Naye Katibu Mkuu Ofisi ya Rais TAMISEMI Adolf Ndunguru ametoa rai kwa Wakuu wa Mikoa kuweka utaratibu mzuri wa usimamizi wa utekelezaji wa ahadi zilizowekwa na Wadau, kuanzisha ‘Kanzidata’ kwa kila mkoa ili kurahisisha ufuatiliaji na tathmini ya ahadi zilizotolewa lakini pia kuendelea kuwaelimisha Wadau kwa kuwa zoezi hilo ni endelevu.

Mpaka sasa Washirika wa GPE Duniani wanatoa msaada wa kifedha kwa nchi 88 ili kuinua Sekta ya elimu na kutimiza lengo la kutomuacha nyuma mtoto yeyote katika kupata haki ya elimu.

Katika ahadi zilizotolewa mkoa wa Mara umeibuka kidedea kwa kutoa ahadi ya Shilingi Bilioni 155 wakati Dar es Salaam ukiahidi kutoa Shilingi Bilioni 20.