Wakurugenzi Mamlaka za Serikali za Mitaa watiwa Mtegoni

Imewekwa tar.: January 7th, 2021

Na Atley Kuni, KAGERA

Wakurugenzi katika Mamlaka za Serikali za mitaa nchini, wamewekwa katika sintofahamu ya nyadhifa zao pamoja na wasaidizi wao endapo watashindwa kufikia viwango vya makusanyo ya mapato vilivyo kubalika kwa mwaka wa fedha 2020/21 ambacho ni asilimia 85.

Waziri wa Nchi Ofisi ya Rais-TAMISEMI, Mhe.Selemani Jafo akiongea kwa Nyakati tofauti wakati wa ziara yake kwenye Mikoa ya Kanda ya Ziwa ziara ambayo inakwenda sambamba na kufanya vikao vya ndani na watumishi, ameendelea kusisitiza kwamba, wakurugenzi wa Mamlaka za Serikali za Mitaa watapimwa pamoja na vigezo vingine lakini pia suala la ukusanyaji wa Mapato kwenye Halmashauri wanazo ziongoza.

“Tangu Serikali ya awamu ya tano iingie madarakani, ajenda kubwa ya Mhe. Rais imekuwa ni ukusanyaji wa mapato, hili tumeliimba kwa kipindi chote cha miaka mitano iliyopita, sasa tufike mahali tusema basi, haiwezekani leo ni Mwezi Januari 2021, nusu ya Mwaka wa Serikali wa 2020/21 imeisha lakini  wewe Mkurugenzi na wataalam wako katika Halmashauri yenu hamjafikisha hata asilimia 30 hii ni aibu” Amesema Mhe. Jafo

Mhe. Jafo, amesema, wapo baadhi ya watendaji wanaofikiri adhabu itawagusa Wakurugenzi pekee yao, amesema kuwaza hivyo sio sahihi, bali katika wakati wa sasa adhabu hiyo itakwenda sambamba na watu wote wanaoguswa na mnyororo huo wa ukusanyaji wa mapato.

“Ndugu zangu hakuna Halmashauri ambayo itaweza kujiendesha endapo itashindwa kukusanya mapato ipasavyo, hivyo kama mwaka wa jana tuliweka wastani wa asilimia 81 lakini tukafika asilimia 94, ni matumaini yangu kwa mwaka huu haitatokea Halmashauri ikakusanya chini ya asilimia 85” alisisita Waziri Jafo.

Katika hatua nyingine, Waziri jafo, amewataka watumishi wa umma kuacha kufanya kazi kwa fitna na majungu na badala yake wajitahidi kufanya kazi kwakupendana ili waweze kuacha kumbukumbu (Legacy), pindi wanapo staafu utumishi wa umma.

“Asilimia zaidi ya 80 ya muda wenu  ninyi watumishi wa umma mnautumia, mikiwa eneo la kazi, hivyo ni rai yangu lazima muishi kwakupendana ninyi kwa ninyi, wapo baadhi ya watu, wao kila kiongozi anapofika yeye ni wa kwanza kupeleka fitna na majungu, niwaambie hiyo sio tabia nzuri, amesema Jafo.

Kuhusiana na suala la upandishaji wa vyeo kwa watumishi wa umma, Waziri Jafo amesema suala hilo lipo chini ya Himaya ya Mkurugenzi  kwa Ushirikiano wa Karibu na jopo la Menejimenti ya Halmashauri husika.

“Ndugu zangu cheo hapandishi Mkuu wa Nchi wala mimi Waziri wa Nchi, upandishwaji wa vyeo unaanzia katika ngazi unayofanyia kazi kwakuweka katika mipango ya bajeti, lakini inashangaza unakuta mtumishi hajapanda cheo kwa miaka sita na kinachofuata ni kutoa lawama kwa uongozi wa juu, kumbe tatizo lilianza kwa mkuu wako wa idara kutokukuweka katika bajeti” amesema Jafo.

Akitoa Salaam za Mkoa huo kwa nyakati tofauti, Mkuu wa Mkoa wa Kagera, Mhe. Brig.Gen. Marco Gagut, amempongeza Mhe. Jafo kwa Kuchaguliwa kuwa Mbunge wa Jimbo la Kisarawe na wananchi wa Jimbo hilo, lakini akampongeza zaidi kwakuaminiwa na Mhe. Rais na kurejeshwa tena katika Ofisi hiyo kama Waziri wa Nchi Ofisi ya Rais-TAMISEMI.

Waziri jafo akiwa mkoani Kagera, ametembelea Hospitali, Vituo vya Afya pamoja shule kisha kufanya mikutano miwili na watumishi wa umma katika Halmashauri za Wilaya za Biharamulo na Ngara, ambapo sehemu zote alizopita ameendelea kuwasisitiza watumishi kufanya kazi kwa kupendana na kuacha tabia ya majungu na fitna. Aidha katika ziara hiyo Mhe. Waziri Jafo ameridhishwa na kasi ya Miradi ya Maendeleo inayotekelezwa katika Mkoa wa Kagera.

MWISHO.