Viongozi TBA Kigoma matatani kwa kushindwa kukamilisha miradi

Imewekwa tar.: January 18th, 2021

Na Mwandishi wetu, Uvinza

Viongozi wa Wakala wa Majengo nchini (TBA) katika mkoa wa Kigoma akiwemo Meneja wa mkoa, wamekamatwa baada ya kushindwa kukamilisha miradi ya ujenzi waliyokabidhiwa kwa muda ulipangwa huku wakiwa wameshalipwa sehemu kubwa ya fedha za ujenzi.

Hatua hiyo inafuatia ziara ya Waziri Nchi, Ofisi ya Rais, Tawala za Mikoa na Serikali za Mitaa Mhe. Selemani Jafo, mkoani Kigoma kutoridhika na utendaji wa viongozi hao ya kushindwa kusimamia miradi ya majengo ya Utawala ya viongozi na watumishi walio chini ya wizara hiyo Wilayani Uvinza mkoani Kigoma.

Mhe. Jafo alionesha kukerwa na taarifa ya ujenzi wa majengo hayo iliyotolewa mbele yake na Meneja wa miradi ya ujenzi katika ofisi ya Mkuu wa Mkoa wa Kigoma Mhandisi Masawika Kachenje.

“TBA walipewa kiasi cha shilingi milioni 500 kwa ajili ya ujenzi wa nyumba ya Mkuu wa Wilaya Uvinza, miaka mitano iliyopita ambapo hadi Sasa nyumba hiyo haijakamilika na ipo usawa wa msingi,” alisema Waziri Jafo, na kuongeza:

 “TBA pia mmelipwa kiasi cha shilingi milioni 900 na Serikali, lakini mradi umekwama kwa miaka zaidi ya mitatu sasa ujenzi upo usawa wa madirisha hii haikubaliki” alisisitiza waziri Jafo

Akitoa taarifa kwa Waziri Jafo, Mhandisi Kachenje, alisema miradi hiyo ilianza kutekelezwa mwaka 2013 na ilipaswa kuwa imekamilika mwaka 2018 ambapo waliomba pesa kwenye miradi hiyo Kama malipo ya awali.

Kachenje alisema kuwa, pesa kwenye miradi hiyo ziliingizwa kwenye akaunti ya TBA makao makuu lakini taarifa zinaonyesha kuwa pesa hizo hazikupelekwa kwenye eneo la mradi toka wakati huo.

Naye Mkuu wa wilaya Uvinza, Mwanamvua Mrindoko alimweleza Waziri Jafo kuwa, analazimika kuishi kwenye nyumba za “kontena” zilizoachwa na mradi wa ujenzi wa barabara za kiwango cha lami wa Kidahwe hadi Uvinza kutokana na kukwama kwa ujenzi wa Nyumba ya Mkuu wa wilaya.

Mrindoko alisema kuwa wamefanya jitihada kuhakikisha TBA wanarejesha fedha lakini hakuna mafanikio walio yapata

 Kutokana na hali hiyo Waziri Jafo ameagiza kuorodheshwa kwa miradi yote iliyokwama kwa mkoa wa Kigoma ambayo ilikuwa inatekelezwa na TBA, kueleza thamani ya kazi iliyofanyika na kiasi Cha pesa kilichopelekwa kisha taarifa hiyo iwasilishwe ofisini kwake mapema iwezekanavyo