Vikundi 20 Ukerewe vyapatiwa sh milioni 51 kujikwamua kiuchumi

Imewekwa tar.: February 15th, 2021

Na Stephen Msengi, Ukerewe.

Jumla ya mikopo yenye thamani ya Sh 51,744,000 ilitolewa kwa vikundi 20 vya wanawake, vijana na walemavu katika Halmashauri ya Ukerewe katika mwaka wa fedha 2018/2019 ili kuwawezesha wanavikundi hao kujikwamua dhidi ya lindi la umasikini.

Kaimu Mkuu wa Idara ya Maendeleo ya Jamii  wa Halmashauri hiyo Cecilia Oswago ameeleza kuwa fedha hizo zilitolewa kwa vikundi 13 vya wanawake, 4 vijana na 3 watu wenye ulemavu vikiwa na jumla ya wanufaika 307.

Amesema kuwa kiasi hicho kimetokana na asilimia 10 ya mapato halisi ya ndani ya halmashauri hiyo na kuwa mikopo hiyo imelenga kuwawezesha wananchi wa ukerewe kutoka kwenye makundi hayo kujikwamua na lindi la umasikini kwa kujishughulisha na kazi mbalimbali.

Miongoni mwa vikundi vilivyonufaika na mkopo huo ni Kikundi cha Vijana Chapakazi cha Nansio Ukerewe ambacho kupitia Mwenyekiti wake Alex Kabuka, licha ya kukiri kupokea kiasi cha sh.milioni tano kwa ajili ya kununulia pikipiki mbili za kikundi chake, ameishukuru serikali ya awamu ya tano kwa kuwawezesha vijana kujikwamua na lindi la umasikini..

“Tunaishukuru serikali kwa mkopo huu kwani umetuwezesha kununua bodaboda mbili za kubeba abiria, walau sasa tunahudumia familia zetu na tunaweza kuanza kurudisha mkopo,” amesema.

 Kwa upande wake Mwenyekiti wa Kikundi Cha Ushirika Sokoni kinachojishughulisha na ushonaji nguo Imelda Chrisanti ameishukuru serikali kwa kuwapa mkopo huo wa sh.milioni nne ambao umewawezesha kupanua wigo wa biashara yao  na kuanza kuuza nafaka kama mchele na mahindi kwa kuchukua meza mbili sokoni na kuwawezesha kuuza kwa wingi na kutengeneza faida na kuanza kurejesha mkopo huo.

“Mpaka sasa tumerejesha kiasi cha Tsh 3,840,000/- hii ni kutokana na mgawanyo tuliojiwekea katika milioni 4 biashara ya Ushonaji tuliongeza milioni moja na kuanzisha biashara ya kuuza nafaka kwa milioni tatu,” amesema Chrisanti.

Naye Deusdedith Mtobesha kutoka kikundi cha walemavu cha Bukongo ameilezea mikopo hiyo kama mkombozi mkubwa kwao kwani kupitia mkopo wa sh milioni tano walioupata umewawezesha wao kuongeza wigo wa biashara yao kupata shughuli za useremala na utengenezaji wa samani na mizinga ya kufugia nyuki.

“Kikundi kimefanikiwa kuongeza biashara ambapo mbali na shughuli za Useremala na kutengeneza mizinga ya nyuki wanauza mbao kwa jamii inayowazunguka na kutengeneza madawati ya wanafunzi wa shule ya msingi na sekondari kwa kadri wateja wanavyopatikana,” amesema na kuongeza:

 “Kwa mwezi disemba mpaka sasa tumefanikiwa kutengeneza mizinga 100 na madawati 50 na kutuwezesha kurejesha kiasi cha sh. 1,250,000 kufikia sasa,’’ amesema Mtobesha.

Halmashauri ya Wilaya ya Ukerewe inatekeleza sera ya taifa ya mwaka 2019 inayohusu utoaji wa mikopo wa asilimia 10 kwa vikundi vya wanawake, vijana na watu wenye ulemavu ambapo mgawanyo wa asilimia kwa vikundi vya wanawake ni asilimia 4, vijana ni asilimia 4 na watu wenye ulemavu ni asilimia 2.