Vijiji 7307 kati ya 12400 vimekwishapatiwa Maafisa kilimo

Imewekwa tar.: December 16th, 2019

Na Majid Abdulkarim

Serikali imesema kuwa katika Sekretarieti za Mikoa na Mamlaka ya Serikali za Mitaa kuna Maafisa Ugani 7307 wanaotoa huduma za kilimo mazao, 3795 wa mifugo na 419 kwa ajili ya uvuvi.

Kauli hiyo imetolewa leo jijini Dodoma na Mwakilishi wa Katibu Mkuu Ofisi ya Rais Tawala za Mikoa na Serikali za Mitaa Dkt Andrew Komba wakati wa ufunguzi wa mkutano mkuu wa mwaka wa Maafisa Ugani kutoka mikoa na halmashauri zote za Tanzania bara.

Katika mkutano huo ambapo mgeni rasmi alikuwa ni Waziri wa Kilimo Mhe. Japhet Hasunga, Dkt Komba amesema idadi hiyo ni ndogo kutosheleza mahitaji ya huduma za ugani kwa vijiji vyote nchini ukizingatia kuwa vipo vijiji 12400 nchini.

Akizungumzia kuhusu chama cha Maafisa ugani, Dkt Komba ambaye pia ni Mkurugenzi wa Idara ya Uratibu wa Kisekta kutoka Ofisi ya Rais TAMISEMI ameelezea umuhimu wa chama hicho katika kuleta muunganiko mzuri kati ya serikali kuu na Maafisa ugani waliopo katika Mamlaka za Serikali za Mitaa.

Amesema kuwepo kwa chama hicho kutaleta muunganiko mzuri kati ya Ofisi ya Rais TAMISEMI na maafisa ugani wa kilimo mazao, mifugo na uvuvi waliopo kwenye Mamlaka ya Serikali za Mitaa.

“Kwa muda mrefu sisi kama watendaji wa kuu kwa upande wa serikali kuu na wataalam wa kilimo waliopo katika ngazi ya halmashauri tulikuwa tunakosa plat form ya kukaa pamoja kama hivi ili kujadiliana changamoto mbalimbali zinazotukabili,” amesema Dkt Komba.

Pia amesema Ofisi ya Rais TAMISEMI itaendelea kutoa ushirikiano katika tasnia ya ugani ili weledi na ufanisi uweze kufanikisha katika kuendeleza sekta ya kilimo nchini.

Kwa upande wake Waziri wa Kilimo Mhe. Japhet Hasunga amewataka maafisa ugani nchini kukuza kilimo cha kisasa kwa watanzania ili kuongeza kipato cha mtu mmoja mmoja na pato la nchi kwa ujumla.

Amesema ni jukumu la maafisa ugani kutoa elimu ya kilimo cha kisasa kwa wakulima ili kuinua uchumi wa nchi kwani kilimo ni mhimili wa uchumi nchini.

Kwa mujibu wa takwimu mbalimbali zilizopo, wakuloima wengi nchini wanalima kilimo cha hasara kwa vile kilimo chao siyo cha kisasa kinachozingatia matumizi sahihi ya ardhi na maji kama awamu ya nne ya program ya kuendeleza sekta ya kilimo nchini inavyoelekeza.

Aidha Waziri Hasunga ameeleza kuwa kutokana na asilimia 80 ya wakulima nchini kiwango chao cha juu cha elimu ni darasa la saba upo umuhimu mkubwa kwa maafisa ugani kuhakikisha kuwa wakulima hao wanapatiwa mafunzo ya ugani ili waweze kuondokana na kilimo cha hasara.

Mhe. Hasunga ameongeza kuwa Kilimo kinachangia asilimia kubwa katika kukuza uchumi wa taifa hivyo niwatake maafisa ugani nyote katika maeneo yenu ya kazi kuwa na mifumo halisi ya wakulima mnao wahudumia na kujua maendeleo halisi ya kila mkulima katika eneo lako la kazi ili kuleta matokeo chanya katika sekta hii ya kilimo.

Mkutano Mkuu wa maafisa Ugani wa kilimo nchini umeratibiwa na Ofisi ya Rais, Tawala za Mikoa na Serikali za Mitaa kwa kushirikiana na Wizara ya Kilimo na Wizara za Uvuvi na Mifugo.