Uwekezaji wa Elimu umguse Mwalimu – Mhe Doto Biteko

Imewekwa tar.: March 13th, 2024

Na. Fred Kibano, Dar es Salaam

Naibu Waziri Mkuu Mhe. Dkt. Doto Biteko amesema uwekezaji unaofanywa katika Sekta ya Elimu ni lazima umguse mwalimu kwani ndiye mwenye dhamana na masuala yaliyopo kwenye mfumo wa elimu.

Mhe. Biteko ameyasema hayo mapema leo Machi 13, 2024 katika Ukumbi wa Diamond Jubilee Jijini Dar es Salaam wakati wa hafla ya kuzindua Programu ya Kuboresha Kada ya Ualimu inayolenga kuboresha mazingira ya kufundishia na kujifunzia.

“mwalimu ndiye rasilimali kuu inayofanya rasilimali nyingine ziweze kuleta matokeo chanya kwenye Sekta ya Elimu, ndio maana programu tunayoizindua leo inaonesha kwa vitendo kuwa Serikali tunatambua kwamba lazima tuwekeze zaidi kwenye mazingira ya kujifunzia na kufundishia lakini pia kuwatambua walimu kuwa ndio watu tunaowategemea kufanya elimu yetu iweze kwenda mbele” Amesema Mhe. Dkt. Biteko.

Akimwakilisha Mhe. Dkt. Samia Suluhu Hassan, Rais wa Jamhuri ya Muungano wa Tanzania amesema, Rais, Dkt. Samia Suluhu Hassan anafanya jitihada za makusudi ili masuala yanayowahusu walimu nchini yafanyiwe kazi ili kuwapunguzia changamoto zinawazowakabili kwa lengo la kutatua changamoto za watoto mashuleni.

Aidha, Dkt. Biteko amesema Serikali inaendelea kufanya maboresha ya bajeti ya Elimu kwani kwa mwaka 2021 jumla ya shilingi Trilioni 4.7 zilitolewa na kuongezeka hadi shilingi Trilioni 5.7 sawa na asilimia 20.4 mwaka 2023.

Kuhusu ufaulu amesema kutokana na kazi nzuri ya walimu kote nchini, wamewezesha kuongeza ufaulu wa wanafunzi wa shule za msingi kwenda sekondari kutoka 907,802 mwaka 2021 hadi 1,092,984 mwaka 2023 ikiwa ni ongezeko la asilimia 20.4 sambamba na kuwapandisha vyeo walimu 227,383 pamoja na kuwabadilishia vyeo walimu 20

Dkt. Biteko ametoa maagizo kwa Wizara ya Elimu, Sayansi na Teknolojia na Ofisi ya Rais TAMISEMI kuangalia utaratibu mzuri wa kuwapa motisha walimu mfano kutenga walau siku moja ya kuwapa motisha walimu badala ya kusubiri Mei Mosi ya kila mwaka lengo likiwa ni  kupata matokeo bora kwa wanafunzi. 

Akitoa maelezo ya awali, Mwenyekiti wa Bodi ya Ushirika wa Elimu Duniani (GPE) ambaye pia ni Rais Mstaafu wa Serikali ya Awamu ya Nne, Mhe. Dkt. Jakaya Kikwete alisema Mfuko wa GPE umeshachangia Dola za Marekani milioni 330 nchini Tanzania na kwamba GPE inaunga mkono juhudi za Serikali kuboresha Sekta ya Elimu ili kila mtoto awe na ujuzi na maarifa na sasa Taasisi hiyo imeidhinisha ufadhili wa Dola za Marekani milioni 80 kwa ajili ya programu.

Awali, Waziri wa Elimu, Sayansi na Teknolojia, Profesa Adolf Mkenda alisema kuwa, programu iliyozinduliwa ya Kuboresha Kada ya Ualimu (GPE TSP) inagusa sehemu mbalimbali katika Kada ya Ualimu ikiwa ni pamoja na kuhakikisha utoshelevu wa walimu, kutoa walimu bora, uwepo wa miundombinu, vitendea kazi, kuendeleza makazi ya walimu na motisha kwa walimu ijapokuwa Serikali inatekeleza haya nao GPE inakuja kuongeza nguvu na  kasi ya utekelezaji wa programu za Serikali ikiwemo Sera ya Elimu.

Naye Charlotta Ozaki Macias Balozi wa Sweeden nchini Tanzania amesema Washirika wa Elimu Duniani (GPE) wataendeleza ushirikiano na Tanzania ili kuhakikisha Programu ya Kuboresha Kada ya Ualimu inafanikiwa na kusema kuwa awamu ya tatu ya ufadhili inawalenga zaidi walimu kwa ajili ya kuwawekea mazingira wezeshi na endelevu ili kutoa elimu bora kwani haki ya kupata elimu ni haki ya kila mtoto.

Kwa upande wake Deogratius Ndejembi, Naibu Waziri Ofisi ya Rais TAMISEMI (ELIMU) amemshukuru Mheshimiwa Rais Dkt. Samia Suluhu Hassan kwa kuendelea kuwekeza katika Sekta ya Elimu kwani uwekezaji alioufanya umeleta tija kwa kuboresha mazingira ya ufundishaji na ujifunzaji lakini pia ameahidi kuendelea kusimamia masuala ya elimu nchini pamoja na mitaala na Sera iliyobereshwa chini ya Wizara ya Elimu, Sayansi na Teknolojia.