UTUMISHI WA UMMA NI KUFUATA TARATIBU, SHERIA NA KANUNI ZA KAZI MHE. SILINDE

Imewekwa tar.: December 23rd, 2022

Na. Asila Twaha,TAMISEMI

Naibu Waziri, Ofisi ya Rais, Tawala za Mikoa na Serikali za Mitaa Mhe. David Silinde amewataka watumishi wa Ofisi ya RAIS –TAMISEMI  kusimamia misingi  ya  Kanuni, Sheria na Taratibu za Utumishi  wa Umma katika kutekeleza majukumu yetu kila mmoja kwenye nafasi yake.

Mhe. Silinde ameyasema hayo Desemba 23, 2022 Dodoma wakati akifunga mafunzo ya kuwajengea uwezo  na kuwakumbusha watumishi majukumu yao sambamba na Utunzaji wa Siri, Kumbukumbu na Nyaraka katika utumishi wa umma.

Ameeleza kuwa Serikali kwa kutambua umuhimu wa kutoa huduma bora kwa wananchi hivyo, watumishi wanapaswa kutimiza jukumu hilo kwa kufuata misingi ya kazi ikiwa ni pamoja na kufuata Sheria, Kanuni na Taratibu za utumishi wa umma.

“Serikali inasisitiza Sheria, Kanuni, Miongozo, Taratibu, Nidhamu, Ufanisi, Uadilifu na utendaji bora wa kazi haki  ikiwa ni misingi ya utendaji bora wa kazi” amesisitiza Silinde

Pia Silinde amewataka watumishi hao kutoa huduma kwa usawa kwa wananchi tunaowahudumia ili wananchi wetu waweze kujisikia amani kuhudumiwa na Serikali yao bila kuwa na vikwazo vyovyote.

Aidha, amewakumbusha watumishi kutojihusisha na masuala ya rushwa kwa namna yeyote ile katika kuwahudumia wananchi na kuwasihi kuendelea  kuchukua tahadhari ya kujikinga na maambukizi dhidi ya virusi vya UKIMWI.

Kwa upande wake Kaimu Mkurugenzi wa Idara ya Utawala na Usimaizi wa Rasilimali Watu Bw. Marko Masaya amesema jumla ya watumishi 565 wa Ofisi ya Rais-TAMISEMI wamepatiwa mafunzo hayo ambayo yamefanyika kwa muda wa siku 5 na kusema  watumishi ambao hawakupata mafunzo hayo kwa sababu mbalimbali utaandaliwa utaratibu ili waweze kushiriki.

Mafunzo hayo yameendeshwa na Maofisa kutoka Ofisi ya Rais – TAMISEMI na yalifunguliwa Desemba 19, 2022 na  Waziri wa Nchi, Ofisi ya Rais, Tawala za Mikoa na Serikali za Mitaa Mhe. Angellah Kairuki.