Utoro shuleni na ufaulu duni wachangia kuzinyima halmashauri fedha za elimu

Imewekwa tar.: July 28th, 2019

Na Mathew Kwembe, Mwanza

Serikali imesema halmashauri nyingi zimeshindwa kupata fedha nyingi za ruzuku zitolewazo na wafadhili kupitia mradi wa Lipa Kulingana na Matokeo (EP4R) kutokana na halmashauri hizo kushindwa kutimiza vigezo vilivyowekwa vikiwemo vigezo vya utoro shuleni na uwezo wa wanafunzi wa darasa la kwanza hadi la tatu kuweza kusoma, kuhesabu na kuandika kulingana na vigezo vya kimataifa.

Kauli hiyo imetolewa jana na Naibu Katibu Mkuu Ofisi ya Rais Tawala za Mikoa na Serikali za Mitaa bwana Tixon Nzunda wakati wa ziara yake katika halmashauri za jiji la Mwanza na Manispaa ya Ilemela kukagua umaliziaji wa maboma yaliyojengwa na na serikali katika halmashauri hizo.

Amesema kigezo cha kwanza ni ufaulu wa wanafunzi shuleni ambapo kigezo kinachopimwa ni kiwango cha ufaulu kwa wanafunzi wa elimu ya awali, darasa la kwanza, pili na la tatu ni uwezo wao wa kujua kusoma kuhesabu na kuandika kwa kuzingatia viwango vya kimataifa ambavyo ni maneno 50 kwa dakika moja.

“Kama watoto wanaweza kusoma maneno 50 vizuri, na wakawa wengi kulingana na tathmini zilivyofanyika, halmashauri hiyo inapata fedha, wakibabaika babaika wako chini, wanaweza kupata kidogo ama sifuri, ” amesema.

Naibu Katibu Mkuu amesema kwa upande wa darasa la nne ufaulu unapaswa kuwa ni wa asilimia 100 ndiyo malengo ya nchi, darasa la saba kiwango cha ufaulu lazima kiwe juu ya asilimia 80 na endapo ufaulu utakuwa chini ya asilimia 80, halmashauri inaweza kupata fedha kidogo au kupata alama sifuri.

Kwa upande wa shule za sekondari, Naibu Katibu Mkuu amesema kigezo cha ufaulu ni kwa wanafunzi wote wa kidato cha pili kufaulu kwa asilimia 100, huku kwa kidato cha nne ufaulu unapaswa kuwa wa daraja la kwanza hadi la tatu uwe zaidi ya asilimia 50, na kwa upande wa kidato cha tano na cha sita ufaulu wa daraja la kwanza hadi la tatu unapaswa kuwa wa asilimia 100.

“Jambo lingine ambalo mnapimwa nalo, na hili ni la wanasiasa, na wewe mama mwenye shule ni retension rate ya watoto ambapo inatakiwa watoto walioanza tangu elimu ya awali wafike hivyo hivyo hadi darasa la saba,” amesema na kuongeza:

“ Watoto walioanza form one (kidato cha kwanza) wafike hivyo hivyo form four na form six, Mhe Diwani, na mwenye shule, mwenyekiti wa kijiji na mwenyekiti wa kitongoji mkifeli kuwafanya watoto wenu wafike shuleni mnapata sifuri kwa sababu wenzenu hapa wanapata zaidi ya shilingi milioni 150” amesema

Bwana Nzunda ameeleza kuwa shule isipowabakisha watoto hao  shuleni, na kwa vile fedha hizo ni za wafadhili zinabaki kwao.

“Kwa hiyo mhe.Diwani, kupanga ni kuchagua na sisi tumechagua fedha zibaki hapa, na hiyo ni kazi ya siasa, kazi ya Mtendaji wa kata, kazi ya afisa tarafa, kazi ya Mkuu wa Wilaya, kazi ya jamii wenye shule kuhakikisha kuwa wanawashirikisha wazazi, na tunatumia nguvu kidogo ya kuhakikisha watoto wanabaki shuleni” amesema bwana Nzunda.

Naibu Katibu Mkuu ametaja kigezo kingine kinachopimwa ni upangaji wa walimu, kuna walimu wamejaa huko sekondari.

“Ni jukumu lenu kupitia baraza la madiwani kuamua kutenga fedha zitakazowezesha kuhamisha baadhi ya walimu hawa waliozidi shule za sekondari waende kule shule za vijijini kwenye mapengo.