Tushirikiane kusimamia miradi ya ujenzi wa EMD na ICU - Dkt. Grace

Imewekwa tar.: November 30th, 2021

Na Asila Twaha, TAMISEMI

Naibu Katibu Mkuu Ofisi ya Rais Tawala za Mikoa na Serikali za Mitaa anayeshughulikia Afya Dkt. Grace Magembe amewataka wataalam wa Afya kusimamia fedha zilizopekwa kwa ajili ya ujenzi wa miradi ya Afya ikiwemo ujenzi wa EMD na ICU.

Akifungua kikao kazi cha kuwajengea uwezo Waganga Wakuu wa Mikoa na Halmashauri, Wahandisi wa Mikoa na Halmashauri na Waganga Wafawidhi wa hospitali zinazotekeleza miradi ya huduma za dharura -EMD na ICU leo Jijini Dodoma Dkt. Grace amesema kuwa, Serikali imetoa fedha kiasi cha shilingi bilioni 236 kwa ajili ya miradi ya afya inayolenga kujikinga na athari za ugonjwa wa COVID -19 ikiwemo miradi ya ujenzi wa huduma za dharura (EMD) na ICU.

Ameendelea kufafanua fedha zilizotolewa ni pamoja na kujenga majengo ya huduma dharura 80, ununuzi wa vifaa tiba, ununuzi wa magari ya kubebea wagonjwa(Ambulances) 195, ujenzi wa huduma ya hewa tiba ya oksijeni ambapo jumla ya oksijeni 5 zitajengwa katika maeneo matano ya kimkakati,  kuimarisha huduma za X-Ray, ununuzi wa mashine 60 za X-Ray na ununuzi wa magari ya usimamizi wa huduma za afya.

Dkt. Grace amesema kikao hicho kitaleta manufaa  kwa kuwakutanisha wataalam hao kwenda kushirikiana na kuleta ufanisi katika kusimamia na kutekeleza  miradi  ya ujenzi wa afya na  huduma za dharura na ICU katika maeneo yao kwani lengo  wananchi kupata huduma bora za afya.

“Kikao kazi hiki lengo ni tupate uelewa wa pamoja sababu sisi wote hapa ni wataalam hatutarajii kuona makosa yanatokea twendeni tukashirikiane kwa pamoja kwa kusimamia na kutekeleza dhamana tuliyopewa ili tutoe huduma bora kwa wananchi”.  amesema Dkt. Grace

Aidha, ameshukuru wandaaji wa mafunzo wakiwemo Abbott Fund Tanzania kwa kushirikiana na Serikali kuhakikisha wanawaleta pamoja wataalam hao na kuhakikisha sekta Afya inaendelea kufikia malengo yake katika kutoa huduma bora kwa wananchi.