TAMISEMI Yaaswa Kuongeza Nguvu Kwenye Kilimo

Imewekwa tar.: August 8th, 2022

Na Fred Kibano, Dodoma

Mkuu wa Mkoa wa Dodoma Rosemary Senyamule ametoa rai kwa Ofisi ya Rais TAMISEMI na Taasisi yake ya Bodi ya Mikopo ya Serikali za Mitaa kuzihamasisha zaidi Halmashauri kuongeza nguvu zaidi kwenye Sekta ya kilimo ili kukifanya kilimo kiwe na tija kwa wakulima.

Senyamule ameyasema hayo baada ya kutembelea banda la Ofisi ya Rais Rais Tawala za Mikoa na Serikali za Mitaa (OR – TAMISEMI) hivi leo na kusema kuwa wananchi wengi wanategemea kilimo kwa ujumla wake hivyo maandiko ya Miradi wa Mpango wa Maendeleo ya Kilimo Wilaya (DADP) ulioanza mwaka 2021/2022 hadi 2025/2026 uzisaidie Halmashauri kuongeza nguvu kwenye kilimo kwa Halmashauri.

“Ofisi ya Rais TAMISEMI iongeze nguvu zaidi kwenye uwekezaji wa kilimo kwa kuwa asilimia 70 ya wananchi wanategemea kilimo, Mijini kuna Miradi ya kimkakati lakini vijijini kama Halmashauri za Kongwa, Mpwapwa, Kondoa na Halmashauri nyingine zipo vijijini nguvu zaidi iende kwenye Sekta ya kilimo” alisema Senyamule.

Aidha, ameitaka Bodi ya Mikopo ya Serikali za Mitaa (LGLB) kuzihamasisha Mamlaka za Serikali za Mitaa kukopa fedha na kuwekeza kwenye kilimo ili kuleta kilimo chenye tija kwa Watanzania.

Awali akimkaribisha Mkuu wa Mkoa wa Dodoma Bi. Rosemary Senyamule, Dkt. Berther Duganga Afisa Kilimo Mkuu kutoka Idara ya Tawala za Mikoa Sehemu ya Uratibu wa Sekta za Kiuchumi Ofisi ya Rais TAMISEMI amesema kwamba Ofisi ya Rais TAMISEMI imekuwa inaandika Maandiko maalum kuhusu Mpango wa Maendeleo ya kilimo wa Wilaya kwa Halmashauri mfano wa andiko hilo ni Halmashauri ya Wilaya ya Arusha kuhusu uchambuzi wa hali ya bidhaa za kipaumbele, malengo ya Mpango, Mnyororo wa thamani, Utekelezaji, Gharama na Tabia fedha na Mfumo wa Tathmini na Ufuatiliaji wa DADP.  

Kauli mbiu ya maonesho ya mwaka 2022 inasema, "Ajenda 10/30 “Kilimo ni Biashara, Shiriki Kuhesabiwa kwa Mipango Bora ya Kilimo, Mifugo na Uvuvi” ambapo Maonyesho hayo kwa Kanda ya Kati yanafanyika Mkoani Dodoma katika Jiji la Dodoma.

Taasisi za Ofisi ya Rais TAMISEMI zinazoshiriki ni pamoja na chuo cha Serikali za Mitaa Hombolo (LGTI), Bodi ya Mikopo ya Serikali za Mitaa (LGLB), Wakala wa Barabara za Vijijini na Mijini (TARURA) na Tume ya utumishi wa Walimu (TSC).