TAMISEMI Sports Club yafunika mchezo wa Riadha SHIMIWI

Imewekwa tar.: October 27th, 2021

Na Asila Twaha, Morogoro

Timu ya TAMISEMI imeendelea kufanya vizuri katika mashindano ya SHIMIWI ambapo imecheza mchezo wa riadha uliofanyika kwa mbio fupi, kati, ndefu na kupokezana vijiti (relay) na kujinyakulia ushindi mkubwa katika mbio hizo.

Mchezo huo ulifanyika Oktoba 27, 2021 katika uwanja wa Jamhuri Morogoro ukianza kutimua vumbi kwa wanawake mbio fupi za mita 100 Salome Luvanda akiwaamsha mashabiki kwa shangwe baada ya kushika nafasi ya kwanza na kufanikiwa kunyakua medali ya dhahabu, kwa mbio za mita 200 Beltila Genadius hakufanya ajizi kwa kushika nafasi ya kwanza nakuifanya timu yake kuwa na medali za dhahabu mbili.

Kwa mbio za mita 400 Tegemea Leah akaungana na watangulizi wake nae medali ya dhahabu ikamuhusu akifutiwa na Nuru Mhomisoli akavunja rekodi kwa mbio za mita 800 na 1500 akishika nafasi ya kwanza na kuzibeba medali mbili za dhahabu akihitimisha jumla ya medali 6 za dhahabu kwa upande wa riadha kwa wanawake.

Neema Chongolo nae hakuachwa nyuma akanogesha ushindi kwenye mchezo wa kurusha tufe kwa hushika nafasi ya kwanza na kuongeza idadi ya medali ya dhahabu kwa timu ya TAMISEMI Queens (riadha) ikawa na medali za dhahabu 7.

Kwa upande wa wanaume mbio za mita 100 Inocent Mbetwa akashika nafasi ya pili akijinyakulia medali ya silver, mita 200 Lutwiko Mwasege medali ya silver, mita 400 Azori Iman medali ya silver, mita 800 na 1500 Atisoni Mbughi akafanya yake na kukamilisha ushindi mnono kwenye mbio hizo kwa nafasi ya kwanza medali mbili za dhahabu akajishindia.

Katika mchezo wa kurusha tufe kwa wanaume Timu ya TAMISEMI Sports Club (riadha)  iliwakilishwa na Lwitiko Mwasege ambae amefanikiwa kushika nafasi ya pili na kushinda medali ya silver.

Kwa mchezo wa kupokezana vijiti (Relay) TAMISEMI Queens imeongoza kwa nafasi ya kwanza na kuchukua medali ya dhahabu na wanaume wakishika nafasi ya kwanza nakuongeza idadi ya medali za dhahabu.

TAMISEMI imejishindia kwa kishindo mchezo huo kwa kuibuka na jumla ya medali 10 za dhahabu na silver 4 hivyo timu hiyo kuwa mshindi wa kwanza kwa mchezo wa riadha SHIMIWI 2021.