TAMISEMI Sports Club yaendelea kupaa SHIMIWI

Imewekwa tar.: October 24th, 2021

Na Asila Twaha, Morogoro

TAMISEMI Sports Club Imeendelea kung'ara katika mashindano ya SHIMIWI kwa timu za Wizara kuendeleza rekodi zao za ushindi.

Leo Oktoba 24, 2021 majira ya 1 asubuhi timu ya TAMISEMA ya mchezo wa kuvuta kamba  imecheza mchezo wa pili katika uwanja wa Jamhuri na kujinyakulia  ushindi wa alama 2-0 dhidi ya Wizara ya Mambo ya Ndani.

Timu ya kamba ya TAMISEMI imecheza mchezo wake wa pili baada ya kucheza mchezo wa awali na timu ya Wizara ya Madini na kupata alama 1-1.

Kufikia sasa timu hiyo inakua na jumla ya alama 3 katika michezo hiyo miwili iliyocheza.

Kwa upande wa  Timu ya TAMISEMI ya Mpira wa Miguu nayo ilichuana vikali na timu ya Wizara ya Uchukuzi na TAMISEMI ikafanikiwa kujinyakulia alama 3 muhimu kwa ushindi wa bao 1-0.

Baada ya mchezo huo Timu ya  TAMISEMI inafikisha alama 6 katika mashindano hayo ikiwa na rekodi nzuri ya kushinda mechi zake mbili bila kuruhusu nyavu zao kutikiswa.

Naye Mkurugenzi wa Idara ya Utawala na Rasilimali Watu OR - TAMISEMI Bw. Victor Kategere amewataka wachezaji wa timu hiyo kuendelea kujituma ili kuendeleza ushindi na makocha kufanya marekebisho zaidi katika sehemu ambazo zinahitaji kufanyiwa hivyo.