TAMISEMI NA MPANGO WA SHULE SALAMA KUKOMESHA VITENDO VYA UKATILI KWA WANAFUNZI

Imewekwa tar.: August 5th, 2024

Na OR – TAMISEMI, Iringa

Ili kukabiliana na Vitendo vya ukatili wa kijinsia kwa wanafunzi, utoro na ukosefu wa chakula mashuleni Ofisi ya Rais TAMISEMI imekuja na Mpango wa Shule Salama, mpango utakaosaidia kuboresha mazingira ya kujifunzia kwa wanafunzi na kuwawezesha kufikia ndoto zao za kielimu

Akizungumza katika mafunzo ya wakufunzi wa Mpango wa shule salama yaliyofanyika mkoani Iringa, Maratibu wa mpango huo kitaifa, Bi. Hilda Mgomapayo alisema utafiti umebaini kuwa zipo changamoto zinazochangia wanafunzi wa shule za sekondari washindwe kumaliza mzunguko wao wa elimu na kuathiri ndoto zao,ambapo miongoni mwa changamoto hizo zinasababishwa na wazazi,jamii na walimu

‘’mpango huu unalenga kubadilisha mitazamo,tabia na mwelekeo wa jamii kwa ujumla dhidi ya watoto ili tuweze kuwalinda na kuwaepusha na vitendo vya ukatili ili tuwawezeshe kukamilisha mzunguko wa elimu”alisema Mgomapayo

Alisema lengo la serikali ni kupunguza vikwazo hivyo kwa wanafunzi na kufanya shule kuwa eneo salama kwa mtoto kufikia ndoto zake kupita mpango wa shule salama nchini ambao ni mpya na unaratibiwa na Wizara ya nchi Ofisi ya Rais, Tawala za Mikoa na Serikali za Mitaa TAMISEMI chini ya Mradi wa kuboresha shule za sekondari SEQUIP.

“baada ya mafunzo haya ya wawezeshaji wa kitaifa tunategemea wataenda kuwawezesha watekelezaji wa mpango huu katika ngazi za Mikoa, Wilaya hadi Kata ambao watakuwa ni Maafisa Maendeleo ya Jamii ngazi ya Kata ambako ndiko jamii ilipo, watafanya ulaghibishi na uchechemzi na mafunzo kwa jamii” alisema Bi. Mgomapayo.

Kwa upande wao baadhi ya washiriki wa mafunzo hayo akiwemo Reginaldo Msendekwa na Saida Mgeni walisema Mpango wa shule salama umekuja wakati muafaka ambapo wanafunzi wanakabiliwa na vitendo vya ukatili wa kijinsia kutokea majumbani hadi mashuleni.

“kimsingi shule salama ni jumla ya mahitaji yote anayoweza kuyapata mwanafunzi ikiwemo chakula, malazi, vitendea kazi pamoja na uwepo wa mazingira mazuri ya kujifunzia,haya yote yanaweza kufanya mtoto kuwa salama na kufanikiwa kufikia ndoto zake kwani anapoyakosa analazimika kuyatafuta nje ya utaratibu na ndiyo maana wengi wanafanyiwa ukatili” walisema.

Pamoja na mambo mengine ya kuboresha elimu Mpango huo pia utasaidia kuimarisha utoaji wa chakula mashuleni na kuzingatia miundo mbinu ya mahitaji maalum.