Sitamvumilia Mkuu wa Mkoa atakayekuwa na mgogoro na watumishi wake: Waziri Ummy

Imewekwa tar.: April 26th, 2021

Waziri wa Nchi Ofisi ya Rais Tawala za Mikoa na Serikali za Mitaa amesema kuwa hatawavumilia wakuu wa mikoa ambao watakuwa na migogoro na watumishi  wao ngazi ya chini kwa kuwa lengo la Serikali ni  kutoa huduma bora kwa wananchi na kuleta maendeleo kwa taifa sambamba na kujenga mahusiano m baina ya watumishi.

Ametoa agizo hilo leo wakati  akiongea na Sekretarieti ya Mkoa wa Tanga wakati wa ziara yake ya kikazi Mkoani humo.

Waziri Ummy amesema kuwa  wakuu wa Mikoa wote nchini  wanatakiwa kutoa miongozo, kujenga ushirikiano baina ya watumishi walio chini yake, kushauri na kutoa maelekezo sitahiki kwa lengo la kujenga umoja, mshikamano na amani kwenye maeneo ya kufanyia kazi ili kuweza kutoa huduma bora kwa wananchi.

Ameendelea kusema kuwa hataweza kuwavumilia viongozi katika ngazi ya Mkoa, Wilaya, Halmashauri  ambao watakuwa ndio chanzo cha Migogoro katika maeneo yao, hatua stahiki zitachukuliwa dhidi yao.

“Utakuta Mkuu wa Mkoa anakuwa yeye ndio chanzo cha migogoro ndani ya Mkoa kwa kugombana na viongozi wa ngazi za chini, hali hii haileti afya kwa taifa na inaondoa kabisa amani katika maeneo ya kufanyia kazi, hivyo ni wajibu wa wakuu wa mikoa kujitafakari kwa kuongoza kwa kutumia busara, hekima na upendo’ amesisitiza Ummy

Aidha amewataka Viongozi mbalimbali katika jamii kuhakikisha wanatoa ushirikiano kwa viongozi wa chini kwa kuelekeza , kufundisha na kukosoa kwa hekima ili kujenga mahusiano bora katika utekelezaji wa majukumu kwa watumishi.