Siku 7 za kuchukua na kurejesha fomu za kugombea nafasi za Uongozi

Imewekwa tar.: October 28th, 2019

Waziri wa nchi Ofisi ya Rais Tawala za Mikoa na Serikali za Mitaa Mhe. Selemani Jafo, kwa mujibu wa Kanuni za Uchaguzi wa Serikali wa Mitaa 2019 ametangaza rasmi siku saba za kuchukua na kurejesha fomu za kugombea nafasi za uongozi.

Zoezi la kuchukua na kurejesha fomu za kugombea kwa nafasi mbalimbali katika ngazi za Vijiji, Mitaa, Vitongoji na Wajumbe wa Serikali ya Kijiji na Wajumbe wa Kamati ya Mtaa kwa ajili ya uchaguzi serikali za Mitaa utakaofanyika Novemba 24 mwaka huu litaanza tarehe 29, Oktoba na litahitimishwa tarehe 4 Novemba, 2019, zoezi ambalo litakuwa la siku tisa.

Akizungumza na waandishi wa habari leo Ofisini kwake, Jijini Dodoma, Waziri Jafo amesema zoezi hilo linahusisha wananchi  wenye sifa na ambao wamepitishwa katika vyama vya siasa vyenye usajili wa kudumu na waliokamilisha taratibu zote kwenye vyama vyao.

Mhe. Jafo pia amewataka  wananchi wote  wenye nia ya kuongoza katika serikali za Mitaa kutumia siku zilizowekwa kikamilifu kwa kwenda kuchukua fomu za kugombea kupitia vyama vyao.

“Zoezi hili litaanza rasmi kesho tarehe 29/10 na litahitimishwa siku ya tarehe 4/11, 2019, na watakao takiwa kugombea ni wale wanaotoka katika vyama vyenye usajili wa kudumu na waliopitishwa na vyama vyao” amesema Waziri Jafo.

Aidha amesema maandalizi yote kwa ajili ya zoezi hilo yamekamilika, na kuwataka watu wote wazingatie kanuni na taratibu wakati wa zoezi la uchukuaji na urejeshaji wa fomu hizo na kuwataka wasimamizi na wasaidizi wa uchaguzi kusimamia kikamilifu zoezi hilo.

Katika hatua nyingine amewataka Wakuu wa Mikoa na Wilaya ambao ndio wasimamizi wa ulinzi na usalama katika maeneo yao  kuhakikisha wanaimarisha hali ya ulinzi na usalama wakati wote wa zoezi la uchukuaji na urejeshaji wa fomu za kugombea nafasi za uongozi.

Amebainisha kuwa ameshatoa barua ya ufafanuzi  kwa vyama vyote vya siasa vyenye usajili wa kudumu kuhusu namna ya uchukuaji na urejeshaji wa fomu utakavyoendeshwa, na amevitaka vyama vyote vizingatie demokrasia wakati wote wa zoezi hilo.

Mnamo Oktoba 22, 2019 Mhe. Jafo alitoa maelekezo kuwa viongozi wa vijiji, vitongoji, Mitaa, na wajumbe wote kuwa uongozi wao ulikoma tarehe hiyo na kwamba shughuli zote zinazohusu ngazi hizo zitafanywa na watendaji wa vijiji,Mitaa, Kata na Wakurugenzi wa Halmashauri.

Amesema “kuanzia tarehe hiyo wenyeviti wa Mitaa,vijiji, vitongoji na wajumbe, hawataruhusiwa kutekeleza majukumu  yeyote kwenye maeneo yao, badala yake Kama kutakuwa na Jambo wanapaswa kushirikiana na kuamuliwa na mtendaji wa Kijiji, Kata na Mkurugenzi wa Halmashauri” amesema,

Jafo alimalizia kuwakumbusha wagombea wote watakajiotokeza kwenda kuchukua fomu  kuwa kufanya kampeni za uchaguzi kabla ya muda wake hairuhusiwi hivyo zoezi la kwenda kuchukua fomu linaweza kuambatana na mbwembwe lakini  zisiwe na muelekeo wa Kampeni.

Mwisho.