Sh. milioni 500 zimetengwa kujenga barabara za lami katika Mji wa Mbinga

Imewekwa tar.: May 11th, 2021

Na Mathew Kwembe, Dodoma

Serikali katika mwaka wa fedha 2021/22 imetenga shilingi milioni 500 kwa ajili ya kujenga barabara za lami katika mji wa Mbinga.

Akijibu swali la Mbunge wa Mbinga mjini Mhe.Jonas William Mbunda ambaye alitaka kujua ni lini serikali itaanza ujenzi wa barabara za lami katika Mji wa Mbinga Naibu Waziri Ofisi ya Rais Tawala za Mikoa na Serikali za Mitaa Mhe.David Silinde amesema fedha hizo zimetengwa kwa ajili ya kumalizia ujenzi wa barabara ya Mbuyula  Hospitali – Ikulu Ndogo yenye urefu wa kilomita 1.

Amesema Halmashauri ya Mji Mbinga ina barabara zenye urefu wa kilomita 7.45 zilizojengwa kwa kiwango cha lami zikiwemo kilomita 0.2 zilizojengwa katika mwaka wa fedha 2020/21 kwa gharama ya Shilingi milioni 170.

Naibu Waziri amesema Serikali itaendelea kujenga na kukarabati miundombinu ya barabara nchini kote ikiwemo Halmashauri ya Mji Mbinga kwa kadri ya upatikanaji wa fedha.

Naye Mbunge wa viti Maalum Mhe.Felista Njau alimuuliza Waziri wa Nchi Ofisi ya Rais TAMISEMI kuwa Serikali ina mkakati gani wa kukamilisha ujenzi wa barabara ya Kairuki hadi Mikocheni Shoppers ambayo hadi sasa imejengwa kipande kidogo, Naibu Waziri Mhe. Silinde amesema katika mwaka wa fedha 2021/22 TARURA Halmashauri ya Manispaa ya Kinondoni imepanga kufanya tathmini ya barabara hiyo na Serikali itatafuta fedha kwa ajili ya kujenga na kuifanyia matengenezo barabara hiyo kwa mujibu wa matokeo ya tathmini.

Naibu Waziri amefafanua kuwa barabara ya Kairuki hadi Mikocheni Shoppers inayojulikana kwa jina la barabara ya Warioba - Chakwu yenye urefu wa kilomita 1.73 ilijengwa kwa kiwango cha lami kipande cha kilomita 1.13 kwa gharama ya Shilingi bilioni 1 katika mwaka wa fedha 2014/15 hivyo kwa sasa inahitaji matengenezo makubwa kikiwemo kipande cha kilomita 0.6 ambacho hakina lami.