Serikali yazionya shule binafsi ziache kukataza wazazi kutembelea mabweni ya wanafunzi

Imewekwa tar.: September 19th, 2018

Na Mathew Kwembe, Dodoma

Serikali imezionya baadhi ya shule binafsi nchini zenye tabia ya kuwakataza wazazi wenye watoto wanaokaa kwenye mabweni kuwatembelea watoto wao mabwenini ili kuona mazingira halisi wanayoishi watoto wao.

Aidha Serikali pia imepiga marufuku mtindo wa baadhi ya shule binafsi ya kutofuata utaratibu uliowekwa na serikali wa watoto kufanya mtihani wa kidato cha pili baada ya kusoma sekondari kwa miaka miwili badala ya wao kulazimisha wasome kwa mwaka mmoja na miezi minne tu.

Akifunga kikao kazi cha watendaji wa elimu ngazi za Mikoa na Halmashauri jana jijini Dodoma, kwa niaba ya Waziri wa Elimu, Sayansi na Teknolojia Profesa Joyce Ndalichako, Katibu Mkuu wa wizara hiyo Dkt Leonard Akwilapo alisema kuwa umeibuka mtindo wa baadhi ya shule binafsi nchini kuwakataza wazazi wanaowatembelea watoto wao wanaokaa kwenye mabweni kutoingia katika mabweni hayo ili wajionee mazingira halisi wanayoishi watoto wao.

Alisema shule hizo binafsi hazina sababu za msingi za kufanya hivyo, kwani wazazi wana jukumu la kufahamu mazingira halisi wanayopaswa kuishi watoto wao shuleni, na hivyo alizionya shule za binafsi zenye mtindo huo kuacha mara moja.

Dkt Akwilapo aliongeza kuwa zipo baadhi ya shule binafsi ambazo zimekuwa zikilalamikiwa na wanafunzi kutokana na kuwa na mazingira mabaya shuleni hasa kwenye mabweni ya wanafunzi na hivyo Wizara ya Elimu kupitia Kitengo cha Udhibiti Ubora wamekuwa wakizifungia shule hizo hadi marekebisho muhimu yafanyike.

“Katika shule za ‘private’ wazazi wanakatazwa wasitembelee mabweni kuona mazingira wanayoishi watoto wao, ni haki ya mzazi kujua mtoto anakaa wapi,” alisema.

Hivyo, Katibu Mkuu huyo aliwataka Maafisa Elimu wa Mikoa na Wilaya kuhakikisha kuwa shule za binafsi zinatekeleza agizo hilo ili watoto waweze kusoma wakiwa katika mazingira mazuri ya mabweni.

Akitolea mfano wa kufungwa kwa mabweni katika shule ya sekondari ya Kigurunyembe ya mjini Morogoro, Dkt Akwilapo alisema kuwa Wizara ilazimika kuyafunga mabweni ya shule hiyo kwani yalikuwa katika mazingira mabaya sana.

Jambo lingine alilolitolea maelekezo ni suala la baadhi ya shule binafsi ya kutofuata utaratibu uliowekwa na serikali wa watoto kufanya mtihani wa kidato cha pili baada ya kusoma sekondari kwa miaka miwili badala yake shule hizo zimekuwa zikilazimisha watoto hao wasome kwa miezi minne tu mara baada ya kufanya mtihani wao wa darasa la saba kwa kisingizio kuwa watoto hao wana vipaji maalumu.

Alisema baadhi ya shule binafsi zimekuwa na mtindo wa kuwafundisha watoto  wanaomaliza darasa la saba kwa miezi minne badala ya mwaka mmoja kwa masomo yote ya kidato cha kwanza.

“Wakishasoma kwa miezi minne, kuanzia septemba hadi disemba ikifika mwezi januari,  wamiliki wa shule hizo hulazimisha baraza la mitihani wawaandikishe wanafunzi hao ili wafanye mtihani wa kidato cha pili, nawaagiza mwende mkalisimamie  na mkemee tabia hii,” alisema

Mbali na maagizo hayo Dkt Akwilapo aliwataka maafisa elimu hao kwenda kushirikiana na halmashauri zao kuhakikisha kuwa wanaongeza madarasa na pia maabara kwa shule za kidato cha tano na sita.

Alisema wizara yake ililazimika kuzikatalia baadhi ya halmashauri zilizokuwa zikitaka ziwe na shule za kidato cha tano na sita kwa kuwa zilikosa kuwa na ubora hasa kwa kutokuwa na madarasa ya kutosha, matundu ya vyoo ya kutosha, mabweni yaliyo katika mazingira bora na sehemu za kupikia zisizoridhisha.

Kwa upande wake Naibu katibu Mkuu Ofisi ya Rais TAMISEMI bwana Tixon Nzunda alisema kuwa kikao hicho kilikuwa ni muhimu kwa ajili ya kupeana taarifa na maelekezo kwa Maafisa Elimu wa Mikoa na Wilaya ambao wengi wao ni wapya.

Alisema kuwa katika kikao kazi hicho, suala la kuzingatia misingi ya maadili ya kazi na nidhamu yalipewa kipaumbele karibu katika mada zote  zilizotolewa.