SERIKALI YAWEKA MIKAKATI KATIKA USIMAMIZI WA MIRADI YA MENDELEO, UKUSANYAJI NA UDHIBITI WA MAPATO KATIKA HALMASHAURI

Imewekwa tar.: March 13th, 2023

Na. Angela Msimbira OR-TAMISEMI

Waziri wa Nchi Ofisi ya Rais Tawala za Mikoa na Serikali za Mitaa Mhe Angellah Kairuki amesema Serikali imeweka mkakati wa usimamizi wa miradi ya maendeleo katika Mamlaka za Serikali za Mitaa ili ilete tija kwa wananchi.

Kairuki ameyasema hayo Machi 13, 2023 wakati wa ufunguzi wa  mafunzo ya Uongozi kwa Wakuu wa Wilaya yaliyofanyika,  Mtumba jijini Dodoma.

Amesema moja ya kigezo cha upimaji kwa Wakuu wa Wilaya na Wakurugenzi wa Mamlaka za Serikali za Mitaa ni kuhakikisha wanasimamia miradi ya maendeleo  kwenye maeneo yao ili iweze kukamilika kwa wakati na kuleta tija kwa jamii

“Haiwezekani Serikali Kuu ikatoa fedha nyingi katika ngazi ya Mamlaka za Serikali za Mitaa halfu fedha hizo hazitekelezi miradi iliyopangwa kwa wakati na pia hatuonyeshi michango ya kudhibiti na kuongeza ukusanyaji wa mapato katika Halmashauri zetu”amesema Waziri Kairuki

Amesema kwa mwaka 2022/2023 lengo ambalo Mamlaka za Serikali za Mitaa ilijiwekea ni kukusanya mapato ya  kiasi cha shilingi  trioni 1.01 hivyo wakuu wa Wilaya wanawajibu wa kusimamia ukusanyaji wa mapato ili kufikia lengo na kudhibiti  matumizi ya mapato

Waziri Kairuki anaendelea kufafanua kuwa Serikali imedhamiria kuhakikisha inaweka nguvu katika ukusanyaji wa mapato ya ndani kupitia vyanzo ambavyo sio kero kwa wananchi, kudhibiti matumizi yasiyo na tija na kusimamia kikamilifu fedha zinazopelekwa katika Miradi ya Maendeleo.

Amewataka Viongozi hao wa Wilaya kuhakikisha  wanasimamia kikamilifu Halmashauri zao na kudhibiti mianya yote ya upotevu wa mapato ya Serikali

Aidha, amesema Serikali imeweka mkazo katika uwezeshaji wa wananchi  kiuchumi ambapo Wakuu wa Wilaya wanawajibu wa  kuhakikisha wanahamasisha maendeleo vijijini ili jamii kuweza kuona mabadiliko na maboresho katika kuchangia kiuchumi

Amewataka Wakuu wa Wilaya kuhakikisha wanasimamia eneo la uwekezaji na kuhakikisha halmashauri zinajitosheleza kipato kupitia miradi ya kimkakati .