Serikali yataka uwazi kwenye matumizi ya Tsh. 12 bilioni za Mradi wa USAID Boresha Afya

Imewekwa tar.: October 18th, 2018

Na Mathew Kwembe, Dodoma

Naibu katibu Mkuu Ofisi ya Rais Tawala za Mikoa na Serikali za Mitaa Dkt Zainab Chaula amewataka Wakurugenzi kutoka Halmashauri 44 zilizo kwenye mradi wa USAID Boresha Afya kanda ya Kaskazini na kati kuhakikisha kuwa fedha zote zinazosaidia jitihada za serikali katika kuboresha sekta ya afya zinaonekana katika mipango kazi ya halmashauri zao.

 Akizungumza kwenye hafla fupi ya kutiliana saini mikataba na matumizi ya fedha za mradi kwa mwaka wa fedha 2018/2019 kwa viongozi wa wilaya nane za mkoa wa Dodoma ambao walitia saini mikataba ya halmashauri zao, na kuwawakilisha wenzao kutoka wilaya nyingine 37, Dkt Chaula alisema kuwa kwa kufanya hivyo kutaondoa changamoto za kiutendaji na kuongeza uwazi na uwajibikaji katika usimamiaji wa fedha zinazotolewa na wadau wa maendeleo katika miradi ya afya kwenye wilaya hizo.

Aliongeza kuwa wadau wengi wa maendeleo wanapobuni miradi ya afya hawashirikishi ngazi mbalimbali za serikali na hivyo wadau hawa kushindwa kuvielewa na kutekeleza vipaumbele vya serikali.

Hata hivyo Dkt Chaula aliusifu mradi wa USAID Boresha Afya kanda ya kati na Kaskazini kwa kuwa wazi na kuweka fedha za mradi katika halmashauri husika.

Mapema Mkurugenzi Mkazi wa Shirika lisilo la Kiserikali la Elizabeth Glaser linalopambana na na VVU/UKIMWI kwa watoto bwana Nelson Ojanji amemweleza Naibu Katibu Mkuu kuwa katika kipindi cha mwaka 2018/19 zaidi ya shilingi bilioni 12 zitatolewa kwa halmashauri 44 zinazotekeleza afua za Kifua Kikuu na Uzazi wa mpango.

“Bajeti za halmashauri washirika wa USAID Boresha Afya zote ziko tayari na viongozi wake watatia saini wakiwa katika halmashauri zao,” alisema Bwana Ojanji

Aidha katika kipindi cha mwaka 2017/2018, bwana Ojanji alisema kuwa zaidi ya shilingi bilioni 11 zilitolewa na Mradi huo kwa halmashauri 44 nchini ambako mradi huo unafanya kazi.

Alisema fedha hizo huwekwa kwenye mipango kazi ya idara za afya za halmashauri hivyo kuzipa halmashauri uwezo wa kupanga na kusimamia matumizi ya fedha na utekelezaji wa kazi za mradi.

Pamoja na kutoa fedhakwa halmashauri USAID Boresha Afya imetoa vifaa tiba mbalimbali vyenye thamani ya zaidi ya shilingi bilioni 3 katika halmashauri zote 44 zinazotekeleza mradi.

Halmashauri zinazotekeleza mradi wa USAID Boresha Afya kanda ya kati na kaskazini ni za kutoka mikoa ya Arusha, Dodoma, Kilimanjaro, Manyara, Singida na Tabora.