Serikali yaridhishwa na usimamizi wa miradi ya maendeleo Tanga

Imewekwa tar.: July 8th, 2020

Na. Angela Msimbira TANGA

Waziri wa Nchi Ofisi  ya Rais Tawala za Mikoa na Serikali za Mitaa Mhe. Selemani Jafo ameridhishwa na usimamizi wa miradi ya maendeleo inayotekelezwa katika Halmashauri ya Jiji la Tanga,Mkoani Tanga

Ametoa kauli hiyo leo wakati akizindua Mradi wa Dampo la Kisasa lililojengwa kupitia mradi wa Uendelezaji Miji  Kimkakati (Tanzania Strategic Cities) wakati wa ziara ya kikazi  ya kukagua  miradi ya maendeleo inayosimamiwa na Ofisi ya Rais Tawala za Mikoa na Serikali za Mitaa  kupitia Halmashauri ya Jiji la Tanga, Mkoani Tanga.

Mhe. Jafo amesema kuwa Jiji la Tanga limekuwa ni la mfano wa kuigwa  kwa Halmashuari zote nchini  kwa kuwa limeweza kusimamia kwa weledi miradi mbalimbali iliyotengewa fedha na Serikali na hivyo kulifanya Jiji hilo kuwa na mabadiliko makubwa katika suala zima la maendeleo.

Amesema kuwa zaidi ya shilingi bilioni 7 zimetumika katika ujenzi wa Dampo la Kisasa chini ya Mradi wa Uendelezaji Miji Kimkakati,, shilingi bilioni 1.4 kwa ajili ya ujenzi wa jengo  la Utawala pamoja na  shilingi bilioni 8 zimetumika kujenga Stendi ya mabasi fedha ambazo ni kutokana na makusanyo ya mapato ya Ndani  ya Jiji la Tanga hivyo bila usimamizi  wenye weledi fedha hizi zisingefikia malengo yaliyopangwa na Serikali ,

Ameupongeza uongozi wa  Mkoa wa Tanga kwa  usimamizi  mzuri wa  miradi ya maendeleo  jambo ambalo limefanikisha kukamilika kwa wakati  na dhamani ya fedha zilizotumika kwenda sambamba na majengo yaliyojengwa, jambo ambalo linasaidia kusogeza maendeleo karibu na wananchi kwa wakati, na kukuza uchumi wa  Jiji la Tanga na Taifa kwa ujumla.

“Nimevutiwa na utekelezaji na usiamizi wa miradi ya maendeleo katika Mkoa wa Tanga, jambo hili linaonyesha kuwa umoja na ushirikiano baina ya watendaji huleta maendeleo kwenye jamii na Taifa kwa ujumla” Amesisitiza Mhe. Jafo

Mhe. Jafo amewataka watumishi wote nchini  kufanyakazi kwa kwa maarifa weledi na kudumisha  ushirikiano katika utendaji kazi wa kila siku  ili kutimiza azma ya Rais wa Jamhuri ya Muungano wa Tanzania Mhe. John Pombe Magufuli ya kutoa huduma bora kwa wananchi maskini na kuleta maendeleo kwa jamiii.

Wakati huohuo, Afisa Mazingira wa Halmashauri ya Jiji la Tanga  Bw. Kizito Nkwabi amesema  mradi wa dampo la kisasa umegharimu  zaidi ya shilingi bilioni  8 ikiwa ni mradi  wa uendelezaji  Miji  na Majiji ambapo lengo likiwa  ni idhibiti wa taka ngumu kwa viwango vinavyozingatia  hifadhi ya mazingira na afya jamii.

Aidha Mhe. Jafo amekamilisha ziara yake katika Halmashauri ya Jiji la Tanga ambapo aliweza ukagua Ujenzi wa Dampo la Kisasa, Ujenzi wa Jengo la Utawala na Kituo cha Mabasi cha Pongwe Mkoani Tanga.